पुजाको तर्क–‘टिमवर्कमा जानुपर्छ भनेर नै उपहार बनायौं’

फागुनको २५ गतेबाट रिलिजमा आउन लागेको फिल्म ‘उपहार’को गीत र ट्रेलर चर्चामा छ । विशेषगरि, यो फिल्मको ट्रेलरमा उठान भएको विषयवस्तु आम दर्शकको कथा भएको निर्माणपक्षले बताउँदै पनि आएको छ । 

मेरो फिल्मसँग कुरा गर्दै फिल्मकी नायिका पूजा शर्माले दर्शकको ठूलो वर्गलाई हेरेर नै यो फिल्म तयार पारिएको बताइन् । उनले भनिन्–‘यो फिल्ममा काम गर्दा निकै रमाइलो भयो । दर्शकले मलाई चुलबुले नायिकाको रुपमा चिन्नुहुन्छ । यसमा पनि मेरो भूमिका चुलबुले नै छ । आशा छ, दर्शकले मेरो यो शैलीलाई मन पराउनुहुनेछ ।’

यो फिल्ममा रेखा थापा, पूजा शर्मा र बेनिशा हमालको मुख्य भूमिका छ । तीन नायिकालाई एकसाथ पर्दामा काम गराउन सहज हुँदैन । पूजा भन्छिन्–‘फिल्म क्षेत्रलाई सबैले मिलेर अगाडि बढाउनुपर्छ । एक्लै हिँड्छु भनेर हुँदैन । हामीले, टिमवर्कमा जानुपर्छ भनेर नै यो फिल्म बनाएका हौं ।’

यो फिल्ममा तीन नायिकाले सहकार्य गरेपछि नै फिल्म क्षेत्रमा अन्य कलाकारहरूले पनि एकसाथ सहकार्य गर्ने परिपाटीको विकास भएको दाबी पूजाको छ । 

फिल्म ‘दान्भी’को छायांकनमा व्यस्त हुँदा पूजा यो फिल्मको प्रचारमा देखिएकी थिइनन् । जसले गर्दा, उनले फिल्मको प्रचारमा साथ नदिएको आरोप समेत लागेको थियो । तर, पूजाले भने फिल्मको प्रचार नै अन्तिम समयमा गर्नुपर्ने भन्दै अब आफूले दौडधूप सुरु गरेको बताइन् । 

फिल्म ‘उपहार’लाई लिएर यसको निर्माणपक्ष जस्तै पूजा पनि विश्वस्त देखिएकी छिन् । फिल्मले दर्शकको ठूलो संख्याबाट साथ पाउने विश्वास उनको छ । विगत ३–४ बर्षयता समाजमा देखिएका घटनाक्रमलाई नै फिल्ममा प्रस्तुत गरिएको उनको भनाई छ । 

ज्ञानेन्द्र देउजाको निर्देशनमा तयार भएको यो फिल्मको ‘वाह..वाह’ बोलको गीत चर्चामा छ ।