नीताको ‘ह्रस्व दीर्घ’ अमेरिका र क्यानडामा विक्री

नायिका नीता ढुंगानाको निर्माणमा तयार भएको फिल्म ‘ह्रस्व दीर्घ’को ओभरसिज राइट्स धमाधम विक्री भइरहेको छ । नेपाली तथा तेलुगु भाषामा रिलिज हुने यो फिल्मको अमेरिका तथा क्यानडामा प्रदर्शन अधिकार पनि विक्री भएको छ ।

यसअघि फिल्मको जापान र दक्षिण कोरियाको अधिकार विक्री भएको थियो । यो फिल्मलाई अमेरिका र क्यानडामा रमेश भट्टको एभरेष्ट इन्टरटेन्मेन्ट तथा अभिजित राई इ–पिक इन्टरटेन्मेन्टले संयुक्त रुपमा लिएका हुन् । 

चन्द्र पन्तको निर्देशनमा तयार भएको फिल्म नेपाली तथा भारतीय कलाकारहरूको बलियो लाइनअपका कारण चर्चामा छ । फिल्ममा साउथका चर्चित कलाकारहरू ब्रम्हानन्दमा, अलि र प्रदीप राउतको अभिनय छ । 

हरिहर अधिकारीको लेखन रहेको यो फिल्ममा हरिहर, नीता ढुंगाना, विपना थापा, सरोज खनाल, गरिमा शर्मा, संचिता लुइँटेल, वुद्दि तामाङ, प्रशान्त ताम्राकार, रविन्द्र झा लगायतका कलाकारको अभिनय छ ।

फिल्मको दुई सेड्यूलमा छायांकन सकिएको छ भने अब १० प्रतिशत बाँकी छायांकन भारतमा गर्ने तयारी गरिएको छ । यो फिल्म आउँदो बर्षको असोज ११ गतेबाट रिलिज हुँदैछ ।