‘दयारानी’लाई हिट घोषणा गर्न मेकरको हतारो

माघको २६ गतेबाट रिलिजमा आएको फिल्म ‘दयारानी’ हिट भएको दाबी यसको निर्माणपक्षले गरेको छ । फिल्मले दोस्रो सातासम्म आइपुग्दा साढे २ करोड ग्रस कलेक्शन गरेको भन्दै यसको निर्माणपक्षले फिल्म हिट भएको दाबी गरेको हो । 

तर, फिल्ममा दर्शकको अकुपेन्सी भने निर्माणपक्षले दाबी गरे जस्तै देखिएको छैन । पहिलो साताको केही दिन पोखरामा फिल्मको अकुपेन्सी सुखद देखिएको थियो । दोस्रो सातामा फिल्मको व्यापार देशभर नै दयनीय थियो । तर, निर्माणपक्षले भने फिल्मले रिलिजको ३ दिनमै १ करोड २५ लाख ग्रस कलेक्शन गरेको दाबी गरेको थियो । 

माओत्से गुरुङको निर्देशनमा दयाहाङ राई र दीया पुनको मुख्य भूमिका रहेको फिल्मको लगानी निर्माणपक्षले सार्वजनिक गरेको छैन । तर, हलमा दर्शकको अवस्था निकै कमजोर हुँदा पनि फिल्मको टिमले हिटको घोषणा गर्न हतार गरेको देखिन्छ । 

माघको २६ गते नायक दयाहाङ राई अभिनित ‘हात्तीछाप र दयारानी’ रिलिज भएका थिए । यी दुबै फिल्मको व्यापार गतिलो देखिएको छैन । तर, दयाको फिल्म असफल भएको सन्देश जाँदा उनका आगामी फिल्मको व्यापारलाई असर पर्ने देखेर निर्माणपक्षले ‘दयारानी’लाई हिटको ट्याग भिराउन हतार गरेको देखिन्छ ।