‘महाजात्रा’को पोस्टरमा डाइपर लगाएका विपिन र रवीन्द्र

चैत्रको ९ गतेबाट रिलिजमा आउन लागेको फिल्म ‘महाजात्रा’को फरक फरक पोस्टरहरू सार्वजनिक भइरहेका छन् । फिल्म रिलिज हुन अब एक महिना बाँकी रहेको समयमा यसको निर्माणपक्षले केही पोस्टर र गीत मात्र सार्वजनिक गरेको छ । 

आज सार्वजनिक भएको पोस्टर भने खास छ । जसले दर्शकलाई आकर्षित गर्न सक्छ । सार्वजनिक भएको पोस्टरमा फिल्मका मुख्य तीन कलाकारहरू विपिन कार्की, रविन्द्र झा र रविन्द्र सिंह बनियाँलाई देखाइएको छ । तर, पोस्टरमा यी तिनको बाल्यकालको अवस्था देखाइएको छ । डाइपर लगाएका यी तीन पैसाको अगाडि बसेका छन् । सानैबाट पैसाका लोभी रहेका यी तीनलाई पछि गएर पैसाले सराप्छ भन्दै क्याप्सन लेखिएको छ । 

यसले, फिल्मका मुख्य तीन पात्रको पैसाप्रतिको मोहलाई प्रकट गरेको छ । प्रदीप भट्टराईको लेखन तथा निर्देशनमा तयार भएको यो फिल्ममा हरिवंश आचार्य, वर्षा राउत, दिव्य देव, गौमाया गुरुङ लगायतका कलाकारको पनि अभिनय छ । 

तर, निर्माणपक्षले अहिलेसम्म सार्वजनिक गरेका प्रचार सामाग्रीमा यो पोस्टरले भने दर्शकको ध्यान तान्ने देखिन्छ । 

यो वर्षकै प्रतीक्षित फिल्मको रुपमा रहेको ‘महाजात्रा’ले बक्स अफिसमा पनि बम्पर कमाई गर्ने आँकलन गरिएको छ । निर्माणपक्षले पनि ‘जात्रा र जात्रै जात्रा’ भन्दा ‘महाजात्रा’ अझै  उत्कृष्ट बनेको दाबी गर्दै आएको छ ।