विपिन र मिरुनाको ‘उनको स्विटर’को शिर्ष गीत रिलिज

चाँडै नै छायांकनमा जाने तयारीमा रहेको फिल्म ‘उनको स्विटर’को शीर्ष गीत रिलिज गरिएको छ । फिल्मको फस्टलुक रिलिज गरेपछि निर्माणपक्षले सुमधुर गीत रिलिज गरेको हो । यो गीतमा गायक सुजन चापागाँइको स्वर तथा संगीत छ ।

फिल्मको फस्टलुक सार्वजनिक गर्दा नै गीतको सानो अंश सार्वजनिक गरिएको थियो । सो समयमा नै गीतको पूर्ण अंशको खोजी दर्शकले गरेका थिए । आर्टमान्डुले प्रेम दिवसको अवसर पारेर ‘फूल’ शीर्षकमा पूरा अंश सार्वजनिक गरेको हो ।

गीतमा हर्क साउदको शब्द छ । गीतको भिडियोलाई मोसन ग्राफिक्समा प्रस्तुत गरिएको छ । भिडियोमा विपिन र मिरुनाको फरक गेटअप देखाइएको छ ।

तन्नेरी अवतारमा देखिएका विपिन र मिरुनाले लेकको गोठमा माया साटेको भिडियोमा देखाइएको छ । काठमाडौंमा सेट खडा गरेर भारतका मेकअप आर्टिस्ट अयाज् शेखको मेकअपमा कलाकारलाई देखाइएको छ ।

नवीन चौहानको निर्देशनमा तयार हुन लागेको यो फिल्ममा माओत्से गुरुङ, सुरज तमु, एलेक्स पारस, परीक्षा लिम्बु, मिलन खत्री, अनिल सुब्बा, अरुण पुन मगर, भावना खपाङ्गी मगर, कवि राई, रुपेश लामा, प्रकाश बस्नेत, लक्ष्मी योङहाङ, नरेश लावती लगायतका कलाकारको अभिनय रहनेछ । नवीनले नै फिल्म लेखेका हुन् ।

चिन्तनराज भण्डारीको छायांकन रहने फिल्ममा कृष्ण भण्डारीको सम्पादन, ट्राइटेण्ड कन्सेप्टका रोयल भीमसेनको पब्लिसिटी डिजाइन रहनेछ ।