‘पिताम्बर’मा ३ नायिका पक्का, आँचल र सुरक्षापछि सुपुष्पाको इन्ट्री

निर्देशक कृषा चौलागाईंले निर्देशन गर्न लागेको नयाँ फिल्म ‘पिताम्बर’मा ३ जना नायिका फाइनल भएका छन् । फिल्ममा यसअघि नै नायिकाद्धय सुरक्षा पन्त र आँचल शर्मा फाइनल भइसकेका थिए । 

अब, नायिका सुपुष्पा भट्टको पनि फिल्ममा प्रवेश भएको निर्देशक चौलागाईंले जानकारी दिएकी छिन् । योसँगै फिल्ममा ३ मुख्य नायिकाको लाइनअप पुरा भएको निर्माणपक्षको भनाई छ । 

यो फिल्मको १५ दिनको सेड्यूलको छायांकन केही दिनमा नै सुरु हुँदैछ । फिल्मको आज पूजा गरिएको छ । सरस्वती पूजाको दिनमा पूजा गर्दै फिल्मको शुभसाइत गरिएको हो । 

यो फिल्मको केन्द्रीय भूमिकामा नायक प्रदीप खड्काले काम गर्दैछन् । उनको साथमा फिल्ममा सौगात मल्ल, अनुप विक्रम शाही, आँचल शर्मा, सुरक्षा पन्त, सुपुष्पा भट्ट, प्रमोद अग्रहरी, दिव्य देव, कामेश्वर चौरासियाँले काम गर्ने पक्का भएको छ । 

कृषाले यो फिल्मको छायांकन दुई सेड्यूलमा खिच्ने तयारी गरेकी छिन् । पुरुषोत्तम प्रधानको छायांकन रहने फिल्मलाई एक्सन जनरामा निर्माण गर्ने तयारी गरिएको छ ।