निश्चल र स्वस्तिमाको ‘बेहुली फ्रम मेघौली’ पनि  दशैंमा रिलिज हुने

यदि, घोषणा गरिएका सबै फिल्म रिलिज भए भने आउँदो बर्षको दशैँमा फिल्मको भिडन्त आक्रामक हुने देखिएको छ । आउँदो बर्षको दशैँलाई लक्षित गर्दै ‘छक्का पन्जा ५, बलिदान र गाउँ नै रमाइलो’का निर्माताले प्रदर्शन मिति तय गरिसकेका छन् । 

अब, यो भिडमा अर्को एक फिल्म पनि मिसिएको छ । निश्चल बस्नेत र स्वस्तिमा खड्काको निर्माण तथा अभिनय रहने फिल्म ‘बेहुली फ्रम मेघौली’ पनि आउँदो बर्षको दशैँमा रिलिज हुने भएको छ ।

फिल्मको वितरणको जिम्मा डीसीएनले लिएको छ । डीसीएनका प्रमुख अशोक शर्माले फिल्मलाई आउँदो बर्षको दशैँमा रिलिज गर्न लागिएको बताएका छन् । 

यो फिल्मको निर्देशन आकाश बरालले गर्दैछन् । आकासले फिल्म ‘दिमाग खराब’को स्क्रिप्ट लेखेका थिए । 

यो फिल्मको नाम घोषणा भएसँगै चर्चामा छ । फिल्मको छायांकन फागुनको दोस्रो साताबाट चितवनको मेघौलीमा सुरु हुनेछ । नायिका स्वस्तिमा खड्का पहिलो पटक यही फिल्मबाट निर्माता बन्दैछिन् ।