‘एक्सन नायिका’ भनेको के हो मलाई थाहा छैनः प्रियंका कार्की

नायिका प्रियंका कार्कीले आफूलाई ‘एक्सन नायिका’ भनेको के हो भन्ने विषयमा थाहा नभएको बताएकी छिन् । एक्सन फिल्मको निर्माण गर्न लागेकी प्रियंकाले आफै अभिनय पनि गर्दैछिन् । के तपाई अब एक्सन नायिकाको रुपमा देखिन लाग्नु भएको हो भन्ने मिडियाकर्मीको प्रश्नमा उनले भनिन्–‘एक्सन नायिका भनेको के हो, मलाई थाहा छैन । म एउटा कलाकार हुँ । र एक्सन फिल्ममा तपाइहरुले मलाई देख्नु हुन्छ ।’

अहिलेको समयमा एक्सन फिल्म बनाउँदा जोखिम हुन्छ जस्तो लाग्दैन भन्ने पत्रकारको प्रश्नमा उनले भनिन्–‘फिल्म त जुन बनाउँदा पनि जोखिम नै हुन्छ । अहिलेको चलिरहेको जनरामा बनाउँदा पनि जोखिम नै हुने हो । मलाई भने धेरै पहिलेदेखि नै एक्सन जनरामा फिल्ममा काम गर्न मन थियो । यो धेरै अगाडिदेखिको होमवर्क पनि हो ।’

प्रियंकाले इमान्दारिताको साथमा काम गर्नुपर्ने बताइन् । उनले भनिन्–‘मलाई आफूले फिल्म बनाउँदा पनि वा नायिकाको रुपमा काम गर्दा पनि हरेक शुक्रबार फिल्म रिलिज हुँदा डर लाग्थ्यो । नतिजा भनेको हाम्रो हातमा छैन । तर, आफ्नो बेष्ट भने सधैं नै दिने कोशिश गर्नुपर्छ ।’

नायिका कार्कीले आफ्नै होम प्रोडक्शनबाट एक्सन जनरामा फिल्म बनाउन लागेकी छिन् । उनले, यसका लागि पटकथा पनि आफै लेखिरहेकी छिन् ।