‘उनको स्विटर’मा विपिन र मिरुनाको यस्तो लुक्स

नविन चौहानको निर्देशनमा तयार हुन लागेको फिल्म ‘उनको स्विटर’को फस्टलुक रिलिज गरिएको छ । यो फिल्मको फस्टलुकमा नायक विपिन कार्की र नायिका मिरुना मगरलाई फिचरिङ गरिएको छ । रोयल भीमसेनले तयार पारेको पोस्टरमा विपिनको युवा अवतार देख्न सकिन्छ ।

यो फिल्मको लागि कलाकारहरूको लुक्स टेस्ट गरिएको हो । भारतबाट मेकअप आर्टिस्ट बोलाएर लुक्स टेस्ट गरिएको वुझिएको छ । 

फिल्मको छायांकन वैशाखबाट सुरु गर्ने तयारीमा निर्माणपक्ष छ । फिल्मको फस्टलुकमा विपिन आकर्षक स्विटर  लगाएर उभिएका छन् भने मिरुनाको गाउँले भेष देख्न सकिन्छ । 

यो फिल्मको एउटा प्रेममय गीत भ्यालेन्टाइन डेको अवसर पारेर रिलिज गर्ने तयारी समेत निर्माणपक्षले गरेको छ । 

फिल्मको छायांकन सुरु नभएपनि एउटा गीतको छायांकन भने भइसकेको छ । फिल्म ‘उनको स्विटर’बाट नवीनले फिल्म निर्देशनमा डेब्यू गर्न लागेका हुन् । उनले, निर्देशन गरेका थुप्रै म्युजिक भिडियोहरूले बजारमा निकै राम्रो चर्चा समेत पाएका छन् ।