‘दयारानी’को पोखरामा प्रिमियर

फिल्म ‘दयारानी’को आइतबार पोखरामा प्रिमियर गरिएको छ । पोखराको मिडटाउन सिनेमाज्मा आयोजना गरिएको प्रिमियरमा पोखरा महानगरपालिकाका मेयर धनराज आचार्य, गण्डकी प्रदेशका पूर्व अर्थमन्त्री किरण गुरुङ, मादी गाउँपालिकाका अध्यक्ष देवीजंग गुरुङ, कवि रमेश श्रेष्ठ, कलाकार प्रकाश घिमिरे, गायक तथा संगीतकार राजनराज सिवाकोटी, फिल्मका लेखक तथा निर्देशक माओत्से गुरुङ, नायिका दीया पुन उपस्थित थिए । 

प्रिमियर शोमा फिल्मले राम्रो प्रतिक्रिया पाएको छ । फिल्म हेर्न आएका अधिकांश अतिथीहरुले फिल्मको कथावस्तु मन परेको बताए । 

फिल्मका निर्देशक गुरुङले कलाकार भएर अभिनय गर्नु भन्दा बढी निर्देशनमा गाह्रो हुने बताए । बाँसुरी फिल्मस् र माओत्से फिल्मसको ब्यानरमा निर्माण भएको फिल्मलाई शैलेन्द्रध्वज कार्कीले खिचेका हुन् । फिल्ममा दयाहाङ राई, दीया पुन, विजय बराल, प्रमिसा गुरुङ, पुष्कर गुरुङ, टीकाराम घले, शिरिषा कुँवर, नयन गुरुङ लगायतको अभिनय छ ।

मोहन गुरुङ, किरण गुरुङ, केन्द्र लिम्बु र न्यू आईटी भेन्चरको सहकार्यमा निर्माण भएको फिल्मका कार्यकारी निर्माता रामबाबु गुरुङ र अपिल विष्ट हुन् । यो फिल्म माघको २६ गतेबाट रिलिजमा आउँदैछ ।