‘इण्डियन आइडल’बाट बाहिरिएपछि मेनुका लेख्छिन्–‘यो समाप्ती होइन, सुरुवात हो’

नेपाली चेली मेनुका पौडेल भारतको चर्चित गायन टीभी रियालिटी शो ‘इण्डियन आइडल’को प्रतिस्पर्धाबाट बाहिरिएकी छिन् । आइतबारको भागमा उनी उत्कृष्ट १० बाट बाहिरिएको जानकारी दिइएको हो । 

यो शोमा सहभागी भएपछि मेनुकाको गायन कलाको चौतर्फी तारिफ भइरहेको छ । मेनुकाले पनि सामाजिक संजालमा पोष्ट गर्दै आफू उत्कृष्ट १० बाट बाहिरिएको बताएकी छिन् । 

मेनुकाले इण्डियन आइडलको यात्रा सकिए पनि आफ्नो साङ्गीतिक यात्रा भने सुरु भएको उल्लेख गरेकी छिन् । उनले, आफूले पहिले भन्दा झनै सक्रिय रुपमा गीत गाउने पनि प्रतिबद्धता जाहेर गरेकी छिन् । उनले, आफूलाई आफ्ना साङ्गीतिक प्रस्तुतिमा साथ दिन सबैसँग आग्रह समेत गरेकी छिन् । मेनुकाले आफ्नो यो यात्रा सुरुवात भएको भन्दै समाप्तिको रुपमा नबुझ्न पनि आग्रह गरेकी छिन् । 

मेनुकाले ‘इण्डियन आइडल १४’मा सहभागी भएपछि साउथ फिल्म ‘सलार’को लागि शीर्ष गीत समेत गाएकी थिइन् । उनको गायन कलालाई नेपालसँगै भारतका दर्शकहरुले पनि निकै रुचाएका छन् ।