‘फर्की फर्की’ अब जेठ १० बाट रिलिज हुने

निर्माता रोहित अधिकारीले आफू निर्मित फिल्म ‘फर्की फर्की’को प्रदर्शन मिति प्रि पोन्ड भएको जानकारी दिएका छन् । 

यो फिल्मलाई जेठको ११ गतेबाट रिलिज गर्ने तयारी निर्माणपक्षको थियो । तर, अब जेठ १० गते बिहिबारबाट फिल्म रिलिज हुने पक्का भएको निर्माता अधिकारीले जानकारी दिएका छन् । उनका अनुसार, जेठको १० गते बुद्ध जयन्तीको बिदा परेपछि फिल्मको प्रदर्शन मिति प्रि–पोन्ड गरिएको हो । 

आउँदो वर्षकै प्रतीक्षित फिल्मको रुपमा रहेको ‘फर्की फर्की’मा सुयोग गुरुङको कथा तथा निर्देशन, नरेन्द्र मैनालीको छायांकन छ । फिल्ममा अनमोल केसी, जसिता गुरुङ, रवि काफ्ले, समृद्धी अर्याल, कृष्ण मल्ल, निर्मल शर्माको साथमा विशेष भूमिकामा नायक सलोन बस्नेतको अभिनय छ । 

यो फिल्मलाई लिएर नायक अनमोल केसी पनि निकै उत्साहित छन् । फिल्ममा मनोज ओली र रामु न्यौपाने सह–निर्माताको रुपमा छन् ।