‘दयारानी’ ट्रेलरः बाबु बन्न नसकेका दयाहाङ, दोस्रो बिहेको दबाब दिने दीया

माघको २६ गतेबाट रिलिजमा आउन लागेको फिल्म ‘दयारानी’को ट्रेलर रिलिज गरिएको छ । नायक दयाहाङ राई र नायिका दीया पुन अभिनित यो फिल्मको ट्रेलरले पारिवारिक समस्याको कथालाई उठान गरेको छ । 

बाबु बन्न नसकेका दयाहाङ र दोस्रो बिहेका लागि दबाब दिने दियाको नोकझोकमा यो फिल्मको ट्रेलर तयार भएको छ ।

आफ्नो कमजोरी लुकाउने दोस्रो बिहे टार्दै आएका दयालाई अर्की एक युवतीले आफ्नो सन्तानको बाबु भएको आरोप लगाएपछि उत्पन्न परिस्थितिलाई समेत फिल्मले देखाउन खोजेको छ । माओत्से गुरुङको डेब्यू निर्देशनमा यो फिल्म तयार भएको हो । 

बाँसुरी फिल्मस् र माओत्से फिल्मसको ब्यानरमा निर्माण भएको यो फिल्ममा शैलेन्द्र ध्वज कार्कीको छायांकन छ । फिल्ममा दयाहाङ र दीयाको अलवा विजय बराल, प्रमिसा गुरुङ, पुस्कर गुरुङ, टीकाराम घले, शिरीष कुँवर, नयन गुरुङ, सूर्य सुनार, राजेन्द्र थापा, सीतादेवी गुरुङ र क्रिस्टी गुरुङको मुख्य भूमिका छ ।

मोहन गुरुङ, किरण गुरुङ, केन्द्र लिम्बु र न्यू आईटी भेन्चरको सहकार्यमा तयार भएको यो फिल्मका कार्यकारी निर्माता रामबाबु गुरुङ र अपिल विष्ट हुन् ।