मिले पल र पुजा

नायक पल शाह गतबर्षको फागुन १५ गते जेलबाट रिहा भए । एक बर्ष लामो जेल जीवनबाट सफाइ पाउँदै रिहा भएका पलले अहिले निरन्तर फिल्म र भिडियोमा काम गरिरहेका छन् । 

पल शाह जेलमा रहँदा नायिका पूजा शर्मा सर्वाधिक धेरै भेट्न पुगिन् । तर, पल जेलबाट बाहिर निस्किएपछि भने पल र पूजाबीच सम्बन्धमा दरार आएको खबरहरू सार्वजनिक भइरहेका थिए । 

पलसँग पूजाले केही भिडियोमा काम गर्न समेत अस्विकार गरिन् । पल र पूजाबीच यो बीचमा भेट नै भएन । पलले आफ्नी बहिनीको बिहेमा पूजालाई निम्तो नगरेपछि उनीहरुबिचको शीतयुद्ध छताछुल्ल भएको थियो । 

तर, अब भने पल र पूजा एक ठाउँमा आएका छन् । विशेष स्रोतले मेरो फिल्मलाई दिएको जानकारी अनुसार, पल र पूजाबीच पूजाले झम्सिखेलमा संचालनमा ल्याएको ट्याग रेष्टुरेण्टमा भेट भएको हो । पल र पूजाबीच २–३ पटक यही रेष्टुरेण्टमा भेट भइसकेको छ । 

भेटमा पल र पूजाले एक अर्कासँग नबोल्नुको कारण समेत स्पष्ट रुपमा राखेका थिए । साथै, उनीहरूले एक अर्कासँगको असन्तुष्टि समेत पोखेको वुझिएको छ । पूजाले फिल्म ‘पुजार सार्की’को पोस्टर सेयर गर्दै आफ्नो मनपर्ने हिरोहरु भने उल्लेख गरेकी थिइन् । यसपछि भने, पल र पूजाको सम्बन्धमा सुधार आएको धेरैले अड्कल काँटेका थिए । 

अब, पल र पूजा सबै कुरा बिर्सिएर अगाडि बढ्न तयार भएका छन् । पल र पूजाबीच चाँडै नै नयाँ फिल्मका लागि सहकार्य हुन सक्ने वुझिएको छ । तर, उनीहरूले कुन प्रोजेक्टमा एकसाथ काम गर्ने भन्ने टुंगो लागेको छैन । 

पलको हातमा अहिले फिल्मको अभाव छैन । पूजा पनि एकपछि अर्को फिल्ममा व्यस्त छिन् । यसैले, यी दुईले एकसाथ काम गर्न समय लाग्ने पक्का छ । 

तर, एक बर्ष लामो तिक्ततालाई मेट्दै पल र पूजा फेरि नजिक भएका छन् ।