‘खजुरे ब्रो’मा हर्क साम्पाङको एक मिनेटको भूमिका

छायांकनमा रहेको फिल्म ‘खजुरे ब्रो’मा धरानका मेयर हर्क साम्पाङले पनि अभिनय गरेका छन् । उनको फिल्म भित्र एक मिनेटको भूमिका रहेको निर्माणपक्षले बताएको छ । हर्कले आफ्नो चरित्रको छायांकन सकाएका छन् । 

फिल्मका कार्यकारी निर्माता डायमण्ड उप्रेतीले धरानका आइकनिक व्यक्तिको बिषय र सांस्कृतिक पक्षलाई उजागर गर्ने उद्देश्य फिल्मको रहेको बताएका छन् । 

सुरज सुनुवारको निर्देशनमा तयार भइरहेको यो फिल्मलाई दिव्य दृश्य इन्टरटेन्मेन्टको ब्यानरमा निर्माण गरिएको हो । फिल्ममा नवीन मानन्धर र सुरज सुनुवारको निर्माण छ । शिशिर विशङ्खेको छायांकन रहेको फिल्ममा अनमोल गुरुङको संगीत छ ।

फिल्ममा नीति शाह, महेश त्रिपाठी, रेयर राई, नवीन मानन्धर लगायतका कलाकारको अभिनय रहेको छ । यो फिल्मको काठमाडौंको दृश्य खिचेर निर्माणपक्ष धरान पुगेको हो । धरानमा फिल्मको ९० प्रतिशत छायांकन हुनेछ । केही दृश्य दार्जिलिङमा पनि खिचिने निर्माणपक्षले बताएको छ ।