पल शाह भन्छन्–‘पुजार सार्की’लाई लिएर उत्साहित छु’

नायक पल शाहले मङ्गलबारदेखि छायांकनमा जान लागेको फिल्म ‘पुजार सार्की’लाई लिएर आफू निकै नै उत्साहित भएको बताएका छन् । मेरो फिल्मसँग कुरा गर्दै पलले भने–‘फिल्मको स्क्रिप्ट निकै नै बलियो बनेको छ । मेरो भूमिकालाई लिएर पनि म उत्साहित छु ।’

पल एक साता महोत्सवमा दौडँदा फिल्मको वर्कशप भने जारी नै थियो । विशेषगरि, पलले आफ्नो भूमिकामा असन्तुष्टि जनाएर वर्कशपमा सहभागी नभएको भन्ने खालका हल्ला फिल्म बजारमा चलिरहेका छन् । । यो विषयमा मेरो फिल्मसँग कुरा गर्दै पलले भने–‘त्यो सबै वाहियात हल्ला हो । मैले, निर्देशक दिनेश राउतसँग सल्लाह गरेर नै महोत्सवमा सहभागी भएको हुँ । महोत्सवमा जानु अगाडि पनि म वर्कशपमा नै थिएँ ।’

पलले आफ्नो भूमिका अहिले झनै पावरफुल बनेको समेत बताए । यो फिल्मको आइतबार फस्टलुक्स रिलिज गर्ने तयारी निर्माताको छ । यसपछि, फिल्मको छायांकन मङ्गलबारबाट पोखरामा सुरु हुनेछ । पोखरामा नै फिल्मको शुभसाइत गर्दै छायांकन सुरु हुनेछ । फिल्मको प्राविधिकहरूको टिम आइतबार पोखरातर्फ लाग्नेछन् । 

यो फिल्ममा पल शाहको साथमा आर्यन सिग्देल, प्रदीप खड्का, अन्जना बराइली लगायतका कलाकारको अभिनय रहनेछ । फिल्मलाई आउँदो बर्ष रिलिज गर्ने तयारी निर्माणपक्षको छ । ‘पुजार र सार्की’को कथामा निर्माण हुन लागेको फिल्मको शीर्ष भूमिकामा आर्यन र प्रदीप देखिदैछन् । फिल्ममा विकास सुवेदीको लेखन छ ।