‘रङ्गेली’को गीतमा प्रिन्ससँग बोल्ड शिल्पा

फागुनको २५ गतेबाट रिलिजमा आउन लागेको फिल्म ‘रंगेली’मा समावेश ‘हातैले उघारेर’ बोलको गीतको भिडियो सार्वजनिक भएको छ । ओएसआर डिजिटलबाट सार्वजनिक भएको यो गीतमा लीला गजमेर र निशान भट्टराईको स्वर, अर्जुन सुवेदीको शब्द, हुर्कलेस बस्नेतको संगीत छ । 

यो गीतको भिडियोमा नायिका शिल्पा मास्के र कलाकार प्रिन्स विश्वकर्माले नृत्य गरेका छन् । फिल्ममा यी दुई अतिथि कलाकारको रुपमा देखिएका हुन् । सार्वजनिक भिडियोमा शिल्पा बोल्ड देखिएकी छिन् ।

साथमा, यो गीतको भिडियोमा फिल्मका केही दृश्यहरु समेत समावेश गरिएको छ । जसले, फिल्मको कथावस्तुको बारेमा बुझ्न दर्शकलाई अझै सहज हुने देखिन्छ । 

यो फिल्ममा दयाहाङ राई, मिरुना मगर, अर्पण थापा, प्रवीण खतिवडा, रुपेश झा, रमेश वुढाथोकी, शेखर चापागाँई, प्रभाकर न्यौपाने लगायतका कलाकारको अभिनय छ । 

अर्जुन सुवेदीको लेखन तथा निर्देशनमा तयार भएको यो फिल्ममा संसार चौलागाई र रमेश भट्टराईको लगानी छ । फिल्ममा जितेन्द्र खतिवडा र अनुज जंग शाह कार्यकारी निर्माताको रुपमा छन् । फिल्ममा युवक कार्की, शिव शंकर चौलागाई सह–निर्माताको रुपमा छन् । यस्तै, फिल्मका सहयोगी निर्मातामा विवेक खड्का र शिव थपलिया हुन् । 

शिशिर खातीको कोरियोग्राफी रहेको फिल्ममा निमेष श्रेष्ठको सम्पादन, सुशन प्रजापतिको छायांकन छ । ग्याङस्टारको कथामा यो फिल्म निर्माण भएको छ ।