चैत्रबाट ‘कमेडी नाइट्स विथ च्याम्पियन्स’, प्रभात लामको इन्ट्री

यसअघि ‘कमेडी क्लब विथ च्याम्पियन्स’लाई सफलतापूर्वक सम्पन्न गरेका निर्देशक विशाल भण्डारी र उनको टिमले दोस्रो सिजनमा नाम परिवर्तन गर्ने भएको छ । ‘कमेडी क्लब विथ च्याम्पियन्स’ विशालको टिमबाट अर्को टिममा गइसकेको छ । अहिले, यो शोको दोस्रो सिजन प्रशारण पनि भइरहेको छ । 

तर, अब विशाल र उनको टिमले भने ‘कमेडी नाइट विथ च्याम्पियन्स’ नाम दिएर नयाँ शो ल्याउन लागेको हो । यो शोलाई हिमालय टेलिभिजनबाट प्रशारण गर्ने तयारी गरिएको छ । 

शोमा ‘कमेडी क्लब विथ च्याम्पियन्स’को पहिलो सिजनका अधिकांश कलाकारहरू नै हुनेछन् । तर, यसपटक कमेडियन प्रभात लामाले यो शोमा प्रवेश पाएका छन् । प्रभातले अहिले ‘मुन्द्रेको कमेडी क्लब’मा अभिनय गरिरहेका छन् । ‘मुन्द्रेको कमेडी क्लब’को अन्तिम सेड्यूलको छायांकन बाँकी रहेको प्रभातले बताए । यसपछि, आफू नयाँ शोमा आबद्ध हुने प्रभातले बताए । 

सञ्चारकर्मी हुँदै हाँस्य कलाकारको रुपमा अगाडि बढेका प्रभातका लागि यो अवसर कोशेढुंगा बन्न सक्छ । ‘कमेडी नाइट विथ च्याम्पियन्स’मा सुमन कार्की, साजन श्रेष्ठ, पवन भट्टराई लगायतका कलाकारले नै अभिनय गर्नेछन् । उनीहरू अहिले अमेरिकामा रहेकाले फर्किएपछि यो शोको छायांकन सुरु हुनेछ । 

यता, विशालले अर्को शो ‘कमेडी च्याम्पियन्स ३’ पनि प्रशारण गर्ने तयारी गरेको छ । फागुनको ३ गतेबाट यो शो कान्तिपुर टेलिभिजनमा प्रशारण हुनेछ । एक वर्षसम्म यो शो प्रशारण हुनेछ ।