प्रदीपको ‘एक्टर’को विना दर्ता हल्ला, मदनको ‘एक्टर’को भइसक्यो सेन्सर पास

विगत केही महिनादेखि नायक प्रदीप खड्का र नायिका आना शर्माको मुख्य भूमिका रहेन गरी तयार हुन लागेको फिल्म ‘एक्टर’को चर्चा नेपाली मिडियामा चुलिएको छ । फिल्मका कलाकारको छनोटले बजार गर्माएको छ ।

तर, यसको निर्माणपक्षले अहिलेसम्म फिल्मको नाम चलचित्र विकास बोर्डमै दर्ता गरेको नै छैन । विकास बोर्डमा फिल्मको नाम नै दर्ता नगरी निर्माणपक्ष भने फिल्मको चर्चा गर्न लागिपरेको छ । चलचित्र विकास बोर्डका एक सदस्यले अहिलेसम्म बोर्डमा नाम दर्ता नभएको जानकारी मेरो फिल्मलाई दिएका छन् । 

तर, प्रदीप र आनाको मुख्य भूमिका रहने फिल्म ‘एक्टर’को नाम दर्ता विकास बोर्ड अहिलेसम्म नभएको अवस्थामा निर्देशक मदन घिमिरेको निर्देशनमा तयार भएको फिल्म ‘एक्टर’को भने केही समय अगाडि सेन्सर पास भएर च्यारेटी शो समेत भइसकेको छ ।


प्रिन्स थापा, सिभानी गिरी, कशिष दाहाल, सिभु शाह लगायतका कलाकारको मुख्य भूमिका रहेको यो फिल्मको केही दिन अगाडि मात्र च्यारेटी शो काठमाडौंको सिटिसी मलमा भएको थियो । 

मनोहरी थापाको निर्माणमा नेपाली डायस्पोरा इन्टरटेन्मेन्टले यो फिल्म तयार गरेको हो । यसैले, अब राजन भुसालको निर्देशनमा तयार हुन लागेको फिल्म ‘एक्टर’को टिमले यही नाममा फिल्म चलचित्र विकास बोर्डमा दर्ता गर्न नपाउने निश्चित छ ।

तर, नाम नै विकास बोर्डमा दर्ता नगरी फिल्मको निर्माण टिमले प्रदर्शन मिति तय गर्दै कलाकार फाइनल गरिसकेको छ ।