के पिताको भूमिकामा कमब्याक गर्दैछन् राजवल्लभ ?

नायक राजवल्लभ कोइरालाले लामो समयपछि नेपाली फिल्ममा कमब्याकको तयारी गरेका छन् । उनले, राजन भुसालको निर्देशनमा थमन कुमार भण्डारीको निर्माणमा बन्न लागेको फिल्म ‘एक्टर’बाट कमब्याकको तयारी गरेका हुन् । यो फिल्ममा नायक प्रदीप खड्का र नायिका आना शर्मा पनि फाइनल भइसकेका छन् । 

राजवल्लभको कमब्याकसँगै उनको भूमिका के होला भन्ने उत्सुकता पनि उनका फ्यानहरुमाझ छ । 

विशेष स्रोतले मेरो फिल्मलाई दिएको जानकारी अनुसार, यो फिल्ममा राजवल्लभ नायिका आना शर्माको पिताको भूमिकामा देखिदैछन् । आनाको पिता बनेर काम गर्नका लागि राजवल्लभले निर्माणपक्षसँग संझौता गरिसकेको स्रोतले बतायो । तर, यसका विषयमा निर्माणपक्षले भने केही पनि बताएको छैन । 

राजवल्लभ फिल्मलाई लिएर उत्साहित छन् । यसबाट पनि उनी आफ्नो भूमिकामा विश्वस्त रहेको बुझ्न सकिन्छ । 

निर्माणपक्षले यो फिल्मको कथावस्तुको बारेमा केही पनि बताएको छैन । फिल्मलाई सन् २०२४ मै रिलिज गर्ने तयारी निर्माणपक्षको छ ।