फागुन ४ गतेबाट जिग्री रिलिज हुने

फिल्म जिग्रीको प्रदर्शन मिति तय गरिएको छ । यो फिल्म फागुनको ४ गतेबाट रिलिजमा आउन लागेको जानकारी निर्माण पक्षले गराएको छ । आज एक पोस्टर सार्वजनिक गर्दै फिल्मका मुख्य कलाकारसहितको पोस्टर सार्वजनिक गरिएको हो ।

सुस्केरा आर्ट्सको निर्माण तथा प्रस्तुतिमा तयार भएको फिल्मको फरक ३ पोस्टरमा मुख्य कलाकारहरु अभयराज बराल, आकाश मगरलाई स्थान दिइएको छ । कमेडी, क्राइम र एक्सन कथामा निर्माण भएको यो फिल्ममा आकाश मगरको निर्देशन छ ।

फिल्ममा अभयराज बराल, आकाश मगर, सुशील राज पाण्डे, पशुपति राई, सुप्रिया राना, रोशन सुवेदी, जीबन बराल, बासुदेव खनाल, नवीन लम्साल, केदार श्रेष्ठ, दिवाकर घिमिरे, सुशीला लक्ष्मी महर्जन, मनिष ब्याञ्जु, स्नेहा रसाइली, अर्जुन पौडेल, शंकर भण्डारी लगायतको अभिनय छ ।

यो फिल्मले काठमाडौंमा विभिन्न सपना र महत्वकांक्षा बोकेर आउने दुई फरक केटाहरुको कथा भन्छ । फिल्मका कार्यकारी निर्माता कुसुम थापा मगर र निर्माता कुमार श्रेष्ठ हुन् । फिल्ममा सुमित भट्ट र सोमित माझीको छायांकन, सरुन मानन्धरको सम्पादन, सुवास पौडेल र भास्कर स्वाँरको संगीत छ । फिल्मको केही दिनमा नै टिजर सार्वजनिक गर्ने बताइएको छ ।