‘दयारानी’को टिजरमा दया र दीयाको प्रेम, ‘ए हो र’ संवाद हुनसक्छ हिट

फिल्म ‘दयारानी’को टिजर सार्वजनिक भएको छ । माघको २६ गतेबाट रिलिजमा आउन लागेको यो फिल्मको टिजरमा फिल्मका मुख्य कलाकारहरू नायक दयाहाङ राई र नायिका दीया पुनलाई देखाइएको छ ।

यो फिल्मको टिजरले श्रीमान् र श्रीमतीबिचको सम्बन्धको कथालाई प्रस्तुत गरेको छ । सार्वजनिक टिजरमा निःसन्तान रहेका दयालाई दोस्रो बिहे गर्नका लागि श्रीमती दीयाले प्रेरित गरेको देखाइएको छ । 

फिल्मको टिजरमा दया र दीयाबिचको सम्बन्ध, केही रमाइला संवादले दर्शकको मन छुन सक्छ । फिल्म ‘मिस्टर झोले’पछि दया र दीयाले एकैसाथ काम गरेका हुन् । फिल्ममा सालीको भूमिकामा रहेकी प्रमिसा गुरुङको ‘ए हो र’ भन्ने संवादले दर्शकको मन जित्न सक्छ ।

यो फिल्मको निर्देशन माओत्से गुरुङले गरेका हुन् । बाँसुरी फिल्मस् र माओत्से फिल्मसको ब्यानरमा निर्माण भएको यो फिल्ममा शैलेन्द्रध्वज कार्कीको छायांकन छ । फिल्ममा विजय बराल, प्रमिसा गुरुङ, पुस्कर गुरुङ, टीकाराम घले, शिरिषा कुँवर, नयन गुरुङ, सूर्य सुनार, राजेन्द्र थापा, सीता देवी गुरुङ र क्रिस्टी गुरुङ लगायतको अभिनय छ ।

मोहन गुरुङ, किरण गुरुङ, केन्द्र लिम्बु र न्यू आईटी भेन्चरको सहकार्यमा निर्माण भएको यो फिल्मका कार्यकारी निर्माता रामबाबु गुरुङ र अपिल विष्ट हुन् ।