सिक्लेसमा ‘सिनेमा संवाद’ कार्यक्रम आयोजना हुने

चलचित्र पत्रकार संघ नेपाल, कास्कीको आयोजनामा ‘सिनेमा संवाद’ नामक कार्यक्रमको आयोजना हुने भएको छ । सिक्लेसमा आयोजना हुन लागेको यो कार्यक्रम माघको ६ गतेदेखि ८ गतेसम्म चल्नेछ । 

नेपाली फिल्म क्षेत्रका फिल्मीकर्मीहरुले यो कार्यक्रममा आफ्नो विचार राख्नेछन् । कार्यक्रममा ‘सिनेमा र सरकार हिजो, आज र भोलि’ नामक विषयमा अन्तरक्रिया हुनेछ । यस्तै, ‘नेपाली सिनेमाको संवाद कस्तो छ ? कस्तो हुनुपर्छ ?’, सिनेमा भित्र म, म भित्र सिनेमा अनुभव’ विषयमा अन्तरक्रिया तथा संवाद हुने आयोजकले बताएको छ । 

यो संवादमा सहभागी हुनका लागि चलचित्र विकास बोर्डका अध्यक्ष भुवन केसी, निर्देशक तथा निर्माता आकाश अधिकारी, निर्देशक दीपाश्री निरौला, लेखक तथा निर्देशक मनोज पण्डित, नायिका गौरी मल्ल, कलाकार तथा निर्देशक अनुप बराल, नायिका दिया मास्के, सञ्चारकर्मी प्रकाश सुवेदी सिक्लेस पुग्नेछन् । 

चलचित्र पत्रकार संघ नेपाल, कास्की शाखाले हरेक वर्ष यो कार्यक्रमको आयोजना गर्दै आएको छ । जसको प्रभाव नेपाली फिल्म क्षेत्रमा राम्रो परेको देखिन्छ ।