‘चित्रा’बाट तारिफ कमाएकी सिम्रनको हरर फिल्म खेल्ने चाहना

फिल्म ‘चित्रा’ शुक्रबारदेखि हलमा चलिरहेको छ । फिल्मको व्यापारले आफूहरू उत्साहित भएको निर्माणपक्षले बताइरहेको छ । 

यो फिल्म रिलिज भएपछि सबैभन्दा धेरै तारिफ कलाकार सिम्रन खड्काले प्राप्त गरेकी छिन् । सिम्रनको अभिनयको चौतर्फी तारिफ पनि भइरहेको छ ।

फिल्मको शीर्ष भूमिकामा देखिएकी सिम्रनले आफ्नो पात्रलाई उत्कृष्ट तरिकाले निर्वाह गरेको भन्दै प्रशंसा भइरहेको छ । 

सिम्रनले फिल्म ‘प्रेमगञ्ज’मा निर्वाह गरेको भूमिकाले पनि चौतर्फी तारिफ पाएको थियो । सिम्रन आफूलाई आएको प्रतिक्रियाले उत्साहित भएको बताउँछिन् । मेरो फिल्मसँग कुरा गर्दै उनले आफूलाई हरेक प्रकारका भूमिकामा काम गर्ने रहर रहेको बताइन् । 

उसो त सिम्रनले पहिलो फिल्मका लागि अडिसन दिनु अगाडि फिल्ममा तत्काल आउने सोच बनाएकी थिइनन् । पढाइ पुरा गरेर फिल्ममा आउने योजना उनको थियो । तर, अहिले भने उनलाई फिल्मको नशाले छोइसकेको छ ।

सिम्रनले आफूलाई हरेक प्रकारका भूमिकामा काम गर्ने रहर रहेको बताउँदै गर्दा अब भने हरर फिल्ममा काम गर्न मन लागेको सुनाइन् । 

नेपालमा हरर जनराका फिल्महरू निकै कम बन्ने गर्छन् । यसैले, सिम्रनको रहर कहिले पुरा हुन्छ त्यो भन्न सकिँदैन । 

तर, फिल्म क्षेत्रमा अभिनयका कारण स्थापित हुँदै गएकी यी कलाकारलाई अब भने कामको अभाव नहुने पक्का छ ।