अनमोल–प्रदीपसँग डेब्यूको चाहना थियो, रेयरसँग भाग्य लेखेको रहेछ, खुशी छुः नीति शाह

मोडलबाट नायिका बन्न लागेकी नीति शाहले ‘खजुरे ब्रो’ फिल्मबाट डेब्यू गर्न पाउँदा खुशी लागेको बताएकी छिन् । फिल्मको शुभसाइत समारोहमा मिडियासँग कुरा गर्दै नीतिले एउटा राम्रो टिमसँग सहकार्य गर्न पाउँदा आफू उत्साहित रहेको बताइन् । 

तपाइको त अनमोल केसी र प्रदीप खड्कासँग डेब्यू गर्न चाहनुहुन्थ्यो होइन र भन्ने पत्रकारको प्रश्नमा उनले भनिन्–‘चाहना त थियो । तर, भाग्यमा रेयर राईसँग डेब्यू गर्न लेखेको रहेछ । निकै खुशी छु ।’

नीतिले स्टार नायकद्धय अनमोल केसी र प्रदीप खड्कासँग काम गर्ने तयारी समेत गरेकी थिइन् । यी दुवै नायकसँग उनले २–२ वटा फिल्म साइन पनि गरेकी थिइन् । तर, दुवै फिल्म नबन्दा नीतिको डेब्यू अन्यौलमा परेको थियो । 

तर, नीतिले अब फिल्म ‘खजुरे ब्रो’मा काम गरिरहेकी छिन् । नीतिले आफूलाई १८ बर्षको उमेरमा फिल्म ‘ड्रिम्स’बाट अफर आएको तर आफू त्यो समयमा काम गर्नका लागि तयार नभएको बताइन् । 

नीतिले ‘खजुरे ब्रो’ कमेडी जनरामा बन्न लागेको बताइन् । फिल्मको कथावस्तु एकदमै राम्रो रहेको भन्दै उनले दर्शकले मन पराउनेमा आफू विश्वस्त रहेको सुनाइन् । 

यस्तै, फिल्मको शीर्ष भूमिकामा देखिन लागेका कलाकार रेयर राईले भने–‘शिर्ष भूमिकामा काम गर्दा दबाब त निकै सिर्जना हुने रहेछ । अन्य फिल्ममा काम गर्दा आफ्नो एउटा मात्र लाइन हुन्थ्यो । तर, यसमा त डर पनि लाग्ने रहेछ । सबै प्रेसर आफ्नै टाउकोमा परे जस्तो महशुश भइरहेको छ ।’

सुरज सुनुवारको निर्देशनमा तयार हुन लागेको फिल्ममा महेश त्रिपाठी, नवीन मानन्धर, विनिता थापामगर लगायतका कलाकारको अभिनय छ ।