फिल्म ‘म्याऊँ’को घोषणा, अनुप र उत्तमको प्रमुख भूमिका

माघे सक्रान्तीको अवसर पार्दै फिल्म 'म्याउँ' को प्रथम भाग घोषणा गरिएको छ । घोषणासँगै फिल्ममा अभिनेता द्वय अनुप विक्रम शाही र उत्तम प्रधानको प्रमुख अभिनय रहने जानकारी गराइएको छ ।

अनुपको लागि महत्त्वाकाङ्क्षी तथा उत्तमको कम ब्याक रहने  यस फिल्मलाई जय मिडिया म्यानेजमेन्टको प्रस्तुतिमा निर्माण गर्न लागिएको हो । 

यो फिल्ममा लेखन, निर्देशन तथा निर्माण जय राज रायको रहनेछ । मानसिक रूपमा विक्षिप्त अवस्थाको 'साइको किलर', जसको आफ्नै समस्या ग्रस्त अतीत छ । उसले समाजमा देखाउने आफ्नो उपस्थिति र त्यसबाट उत्पन्न हुने परिस्थितिको कथामा यो फिल्म बन्न लागेको रायले बताए । उनले यस फिल्ममा 'ट्विस्ट एन्ड टर्न'को भरपुर प्रयोग गरी शानदार अनुभव दिलाउन कुनै कसर बाँकी नराख्ने बताए ।

फिल्मको प्रमुख भूमिकाको लागि अभिनेत्रीको भने टुङ्गो नलागेको निर्देशक रायले बताए ।

दक्षिण भारतीय फिल्म सङ्गीतका प्रख्यात एजे अलीमिर्जाक नौशाद अलीले सङ्गीत दिने यस फिल्मरमा दक्षिण भारतीय फिल्मका पार्श्व गायक गायिका साई भिग्नेश, पद्मलताले स्वर दिनेछन् । साई चर्चित फिल्म 'कान्तारा'को गीत 'बराह रूपम' र पद्मलता फिल्म 'थानी ओरूभन'को 'कान्नाला कान्नाला' गीतबाट चिनिन्छन् ।

दक्षिण भारतीय फिल्मकै प्रख्यात सिनेमाटोग्राफर आकाश कुमारको डिओपी रहने 'म्याउँ'मा लक्ष्मण सुनारले एशोसियट निर्देशन तथा सम्पादन गर्नेछन् ।

यस फिल्म चीनमा पनि रिलिज हुनेछ । जसको लागि चिनिया वितरक साउथ एसिया मेरीटाईम सिल्क रोड (फुजियान) ईन्टरनेसनल मिडिया को. लि. फिल्ममा आबद्ध भइसकेको छ ।

जेनी खतिवडा राय, केन्द्र रेग्मी र प्रिन्स कुमार चौधरी सह निर्माता रहेको फिल्मकी कार्यकारी निर्माता निशा खतिवडा हुन् । भुटानी फिल्ममा अनुभव लिएका सुमन माझीको साउन्ड डिजाइन र सुदिप भण्डारीको भिएफएक्स रहनेछ । यसको विश्वव्यापी रिलिज लक्ष्य सन् २०२४ राखिएको छ ।