‘उपहार’को पोष्टरमा बेनिशा–तेजको बिहेदेखि पूजा–समर्पणको प्रेमसम्म

फागुनको २५ गतेबाट रिलिजमा आउन लागेको फिल्म ‘उपहार’को चार फरक पोस्टर रिलिज गरिएको छ । फिल्मको दुई वटा गीत सार्वजनिक गरेपछि यसको निर्माणपक्षले चार फरक पोस्टर सार्वजनिक गरेको हो ।

माघे सङ्क्रान्तिको अवसर पारेर सार्वजनिक भएका पोष्टरमा फिल्मका मुख्य कलाकारहरूलाई फरक–फरक तरिकाले समावेश गरिएको छ । फिल्मको फस्टलुकमा मुख्य कलाकारहरू रेखा थापा, पूजा शर्मा, बेनिशा हमाल, मुकुन भुसाल, तेज गिरी, समर्पण जंग कार्कीलाई देखाइएको छ । 

यी पोष्टरहरुले फिल्मको कथाको सार भन्न खोजेका छन् । ज्ञानेन्द्र देउजाको निर्देशनमा तयार भएको यो फिल्ममा रेखा थापा प्रस्तुतकर्ताको रुपमा छिन् । रेखा फिल्मस् र कपनगढी सिनेमा प्रालिको ब्यानरमा निर्माण भएको फिल्ममा सुलभ प्रतिक देउजा र समीक्षा देउजा निर्माताको रुपमा छन् ।

फिल्मका कार्यकारी निर्माता बलराम शाही हुन् । फिल्ममा विष्णु कल्पितको छायांकन, अर्जुन पोखरेल र बाबुल गिरीको संगीत, मित्र डी गुरुङको सम्पादन, सुलक्षण भारतीको कथा, अभिमन्यु निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको एक्सन छ ।

फिल्मलाई रिच इन्टरटेन्मेन्ट र एफडी कम्पनीले वितरण गर्नेछन् ।