‘रङ्गेली’को इन्ट्रो टिजरमा दया र अर्पण दुश्मन बन्दा मिरुना शान्त

फिल्म‘रङ्गेली’को इन्ट्रो टिजर सार्वजनिक गरिएको छ ।

आगामी फागुन २५ गते महाशिवरात्रिको दिन विश्वव्यापी रिलिज हुने फिल्मको टिजरमा सार तथा पात्र परिचय बुझाउँदै कलाकार द्वय दयाहाङ राई र अर्पण थापालाई दुश्मनको रूपमा चित्रण गरिएको छ । अभिनेत्री मिरुना मगरलाई शान्त स्वभावमा थारु युवतीको रूपमा देखाईएको छ ।

सार्वजनिक टिजर हेर्दा कलाकारहरू दयाहाङ, अर्पण र मिरुनालाई हालसम्म देखिएको भन्दा फरक अवतारमा प्रस्तुत गराइएको छ ।

यस फिल्मको लेखक तथा निर्देशन अर्जुन सुवेदीले गरेका हुन् । 'रङ्गेली'मा अर्पण, दयाहाङ, मिरुना सहित प्रवीण खतिवडा, रमेश बुढाथोकी लगायतको प्रमुख भूमिका रहेको छ ।

फिल्मका कार्यकारी निर्माताहरू जीतेन्द्र खतिवडा र अनुज जङ्ग थापा हुन् । निर्माताहरू संसार चौलागाईं र रमेश भट्टराई वशिष्ठ हुन् भने युवक कार्की र शिव शङ्कर चौलागाईँ सह-निर्माता हुन् । विवेक खड्का (योलो) एशोसियट निर्माता हुन् । छायाकार सुशन प्रजापति हुन् ।

यस फिल्मका गीतहरूमा हर्क साउद, अर्जुन सुवेदी र सबिन सिंहको शब्द रचना तथा सुशान्त गौतम र हर्कुलस बस्नेतको सङ्गीत रहेको छ ।

अमेरिकामा कलाकारसहित भिआइपी रेड कार्पेट प्रिमियर हुने यो फिल्म नेपालसँगै नेपालीहरूको बसोबास रहेका अमेरिका, अस्ट्रेलिया, जापान, कोरिया, हङकङ लगायतका विश्वका विभिन्न मुलुकहरूमा एकसाथ रिलिज हुनेछ ।

जापान, कोरिया र हङकङमा उज्ज्वल गुरागाईँ र यूएनए इन्टरटेन्मेन्ट, अमेरिकामा ‘एक्का बास्सा इन्टरटेन्मेन्ट’ र ‘लाइभ एट प्रिजेन्ट’ले ‘रङ्गेली’ रिलिज गर्दैछन् ।