‘पर्खि बसेँ तिमीलाई २’ बनाउन दर्शकको आग्रह, उत्साहित किरण र रक्षा

शुक्रबारदेखि रिलिजमा आएको फिल्म ‘पर्खि बसेँ तिमीलाई’ले इनिसियल व्यापार औसत गरेको छ । दीपक श्रेष्ठको निर्देशनमा तयार भएको यो फिल्मले शुक्रबार र शनिबार औसत व्यापार गर्यो । दुई दिन फिल्मको व्यापार अपेक्षित नभए पनि वर्ड अफ माउथ बलियो भएकाले दर्शक बढ्ने विश्वास निर्माणपक्षको छ । 

फिल्मका मुख्य दुई कलाकार किरण श्रेष्ठ र रक्षा बुढाथोकी शुक्रबार र शनिबार नै विभिन्न हलमा पुगेर दर्शकसँग साक्षात्कार गरे । उनीहरूले, दर्शकबाट निकै नै राम्रो प्रतिक्रिया पाएको भन्दै  उत्साह व्यक्त गरेका थिए । 

दर्शकले फिल्मको सिक्वेल बनाउन निर्माणपक्षसँग आग्रह गरेका छन् । उनीहरूले, फिल्मको कथावस्तुले मन छोएको प्रतिक्रिया दिएका थिए । 

फिल्मका नव–नायक किरण श्रेष्ठले मण्डलाबाट सुरु भएको आफ्नो अभिनय यात्राले  सार्थकता पाएको बताए । यस्तै, नायिका रक्षा बुढाथोकीले फिल्मबाट दर्शकले दिएको प्रक्रियाले आफूलाई आगामी दिनमा अझै काम गर्न सहज हुने बताइन् । 

लभ स्टोरी कथामा निर्माण भएको यो फिल्मलाई राजाराम बुढाथोकीले निर्माण गरेका हुन् । वितरक करण श्रेष्ठले फिल्मको व्यापार सुरुवाती चरणमा औसत भएपनि राम्रो वर्ड अफ माउथका कारण बढ्ने विश्वास व्यक्त गरे । भोलि माघे सङ्क्रान्तिको बिदा भएकाले पनि फिल्मलाई फाइदा हुने देखिन्छ ।