‘खजुरे ब्रो’को सुटिङ सुरु हुँदा नीतिलाई राहत

साइन गरेका फिल्महरू नबन्दा मोडल नीति शाहलाई निकै समस्या भयो । उनले, नाम चलेका ब्यानर र निर्देशकका फिल्म साइन त गरिन् तर ती कुनै पनि फिल्म बनेनन् । जसकाकारण, नीतिले साइन गरेका फिल्म नै बन्दैनन् कि भन्ने सन्देश बजारमा गएको थियो । 

तर, अब भने नीतिलाई राहत भएको छ । उनले, नयाँ फिल्म ‘खजुरे ब्रो’मा काम गर्न  सुरु गरिसकेकी छिन् । यो फिल्मको छायांकन ३ दिनदेखि काठमाडौंमा जारी छ । निर्माणपक्षले भने माघे सङ्क्रान्तिको अवसर पारेर भोलि मात्र यसको शुभ साइत गर्दैछ । 

फिल्ममा नीतिको साथमा रेयर राई, महेश त्रिपाठी, नीति शाह, नवीन मानन्धरको अभिनय छ । फिल्मलाई सुरज सुनुवारले निर्देशन गरिरहेका छन् । फिल्ममा नवीन मानन्धर र सुरज  सुनुवारको लगानी छ । 

फिल्म ‘खजुरे ब्रो’ नीतिको डेब्यू फिल्म हुने देखिएको छ । यो फिल्मको छायांकन सुरु भएपछि नीति उत्साहित छिन् । अर्कातिर, फिल्म क्षेत्रमा उनको प्रवेश बल्ल भएको छ । 

फिल्म साइन गरेर पनि काम सुरु नहुँदा नीति निराश भइसकेकी थिइन् । अब, उनलाई ‘खजुरे ब्रो’ले राहत दिने अपेक्षा गर्न सकिन्छ । फिल्ममा रेयर राई शीर्ष भूमिकामा देखिन लागेको वुझिएको छ ।