‘रेशम फिलिली २’ बन्ने, विनय र सुपुष्पा जोडी बाँध्दै ?

वि.सं २०७२ सालमा रिलिज भएको फिल्म ‘रेशम फिलिली’को सिरिज ‘रेशम फिलिली २’ बन्ने भएको छ । यो फिल्म निर्माणका लागि निर्माता तथा कलाकार विनय श्रेष्ठले काम अगाडि बढाइरहेका छन् । हाल, यो  फिल्मको प्रि–प्रोडक्शनको काम चलिरहेको बुझिएको छ । 

फिल्मलाई निर्माता रौनक विक्रम कँडेलले निर्माण गर्न लागेको बुझिएको छ । मेरो फिल्मलाई स्रोतले दिएको जानकारी अनुसार, यो फिल्मलाई निरोज महर्जनले निर्देशन गर्दैछन् । निरोजले ‘लभ सूत्र’ नामक वेव सिरिजको समेत निर्देशन गरिसकेका छन् । 

यो फिल्ममा नायक विनय श्रेष्ठको मुख्य भूमिका रहनेछ । फिल्ममा नायिका सुपुष्पा भट्टको इन्ट्री हुने संभावना रहेको वुझिएको छ । तर, निर्माणपक्षले यो विषयमा केही पनि बोलेको छैन । 

फिल्म ‘रेशम फिलिली’ कमेडी कथामा निर्माण भएको थियो । फिल्मको ‘पिरतीको छाता’ बोलको गीत सर्वाधिक चर्चामा  थियो । तर, यो फिल्म रिलिज भएको भोलिपल्ट अर्थात् वैशाखको १२ गते भूकम्प गएपछि यसको रिलिज पनि प्रभावित भएको थियो । पछि, यो फिल्मलाई वि.सं २०७२ सालको भदौ महिनामा रिलिज गरिएको थियो । 

अब ‘रेशम फिलिली २’ कस्तो कथामा निर्माण हुने हो, त्यो केही समयपछि खुल्नेछ । तर, यो फिल्म दर्शकका लागि भने प्रतीक्षामा रहनेछ ।