‘एक मुठ्ठी बादल’मा आँचल

फिल्म ‘एक मुठ्ठी बादल’को निर्माण हुने भएको छ । साहारा शर्माको लेखन तथा निर्देशनमा तयार हुन लागेको फिल्ममा नायिका आँचल शर्मा फाइनल भएकी छिन् । फिल्ममा आँचल शर्मा र सहयोग अधिकारीको मुख्य भूमिका रहनेछ । 

अभिमन्यु दीक्षित, अनुप पौडेल र सामीप्य राज तिमिल्सेनाको प्रस्तुतिमा तयार हुन लागेको यो फिल्मले आमा र छोरीको गहन सम्बन्धलाई देखाउनेछ । 

फिल्मको फस्टलुक सार्वजनिक गर्दै आँचलले लेखेकी छिन्–पुस्तौंदेखि चलिरहेको त्याग र बलिदानको परम्परामा के उनले कहिलै आफ्नो आकाशको अंश दाबी गर्न पाउलिन् ? एक मुठ्ठी बादल आमा छोरीहरू बीचको अनौठो सम्बन्धको श्रृतिमधुर संगीत हो । अराजकतालाई अंगाल्ने, अपुर्णतामा उत्सव मनाउने र सामान्यलाई असामान्य बनाउने नेपाली नारीका गाथा आउनुस् फेरि धूनमा सुनौँ ।’

फिल्मको छायांकन फागुन महिनाबाट सुरु हुने निर्माणपक्षले बताएको छ । यो फिल्मलाई लिएर नायिका शर्मा उत्साहित देखिएकी छिन् । 

आँचलले हाल फिल्म ‘डिग्री माइला’को छायांकन गरिरहेकी छिन् । यसपछि, उनले यो फिल्मको छायांकन सुरु गर्नेछिन् । उनले, फिल्म ‘राजामहल’ पनि साइन गरिसकेकी छिन् ।