'चित्रा-२' बन्ने संकेत, क्यानडामा सुटिङ गर्ने तयारी !!

शुक्रबार अर्थात् पुष २७ गतेबाट रिलिज हुने फिल्म 'चित्रा'को सिक्वल बन्ने देखिएको छ।

सोमबार राजधानीमा फिल्मको प्रिमियर गरिएको थियो। फिल्मको अन्तिममा 'चित्रा-२' बन्ने छनक मिलेको हो। 

पारिवारिक विषयमा बनेको फिल्मले प्रिमियरमा प्रशंसा बटुलेको छ। फिल्मको प्रिमियरमा अभिनेता भुवन केसी, अभिनेत्री गौरी मल्ल, दीपा श्री निरौला, निर्मल शर्मा लगायतका थुप्रै फिल्मकर्मीहरु प्रिमियरमा फिल्म हेर्न पुगेका थिए। 

उनीहरूले फिल्मको कथाले आफूहरूको मन छोएको बताउँदै डेब्यू अभिनेता सन्तोष अधिकारी, अभिनेता प्रमोद अग्रहरी, अभिनेत्री सिम्रन खड्का तथा बाल कलाकार आयुशी खड्काको कामको तारिफ गरेका थिए।

फिल्मलाई जुन शैलीमा टुङ्ग्याइएको छ त्यसले निर्माणपक्ष सिक्वलको तयारीका साथ आएको बुझ्न सकिन्छ। फिल्मको एक संवादमा अभिनेता सन्तोषले सशङ्कित हुँदै 'चित्रा' भन्दै बोलेको सुन्न सकिन्छ। त्यसले पनि फिल्मको सिक्वल बन्ने कुरालाई बल पुर्‍याएको छ।

स्रोतका अनुसार निर्माणपक्षले फिल्मको दोस्रो सिक्वललाई क्यानडामा खिच्ने तयारी गरेको छ। त्यसो त नेपाली रजतपटमा विगतमा पनि फिल्मको सिक्वल बनाउने घोषणा भएपनि बक्स अफिसमा फिल्मले आशातीत व्यापार नगर्नाले ती सिक्वलहरु समाचारमै सीमित भएका छन्। 

त्यसैले 'चित्रा'को सिक्वल पनि फिल्मको व्यापारिक प्रदर्शनमा भर पर्ने देखिन्छ। सिक्वल बन्ने नबन्ने भने समय क्रममा स्पष्ट हुनेछ।