‘पर्खि बसेँ तिमीलाई’को शिर्ष गीतमा रोमान्टिक देखिए किरण र रक्षा

पुसको २७ गतेबाट रिलिजमा आउन लागेको फिल्म ‘पर्खि बसेँ तिमीलाई’को शीर्ष गीत युट्युबमार्फत सार्वजनिक गरिएको छ । यो गीतमा प्रमोद खरेल र अनु चौधरीको स्वर, महेश खड्काको संगीत र डाक्टर कृष्णहरी बरालको शब्द छ । 

गीतको अडियो कर्णप्रिय छ । लभ स्टोरी कथामा बनेको फिल्मको गीत संगीतले दर्शकलाई आकर्षित गर्ने देखिएको छ । 

गीतको भिडियोमा फिल्मका मुख्य २ कलाकार किरण श्रेष्ठ र रक्षा बुढाथोकीलाई फिचरिङ गरिएको छ । रामजी लामिछानेले भिडियोको कोरियोग्राफी गरेका हुन् । फिल्मको गीतले पनि दुई पात्रको प्रेम र समर्पणलाई व्यक्त गरेको छ । 

यो फिल्मको ट्रेलर सार्वजनिक भइसकेको छ । ट्रेलरलाई दर्शकले रुचाएका छन् । दीपक श्रेष्ठको निर्देशनमा तयार भएको यो फिल्ममा राजाराम बुढाथोकीको लगानी छ । 

रोमन फिल्म र तपश्री फिल्मस् (सिक्किम) को संयुक्त ब्यानरमा निर्माण गरिएको फिल्ममा अनिशा रसाइली, शिव श्रेष्ठ, विल्सन विक्रम राई, सुनिता श्रेष्ठ लगायतका कलाकारको पनि अभिनय छ ।

फिल्ममा राजाराम बुढाथोकीको निर्माण, कोमल गुरुङको सह–निर्माण, परिच्छेद सेन, मौनता श्रेष्ठ र पुरुषोत्तम ढुङ्गेलको लेखन, संकल्प भुजेलको छायांकन, शम्भुजित बाँस्कोटा, दीपक शर्मा, महेश खड्का र बाबुल गिरीको सङ्गीत, भूपेन्द्र अधिकारीको सम्पादन, मनोरञ्जन श्रेष्ठको कलर करेक्सन, रामजी लामिछाने र निशा रसाइलीको नृत्य निर्देशन  छ ।

फिल्मको छायांकन नेपालसँगै सिक्किमको रमणीय दृश्यमा गरिएको छ । फिल्मलाई काठमाडौँ उपत्यकामा करण श्रेष्ठले रीच इन्टरटेनमेन्ट मार्फत र मोफसलमा एफडी कम्पनीले प्रदर्शनका लागि वितरण गर्नेछन् ।