झरना थापाले सुरु गरिन् ‘ए मेरो हजुर ५’को तयारी

सुहाना इन्टरटेन्मेन्टको ब्यानरमा नयाँ फिल्म निर्माण हुने भएको छ । निर्माता सुनील कुमार थापाले नयाँ फिल्म ‘ए मेरो हजुर ५’को तयारी सुरु गरेका छन् । 

फिल्मको निर्देशन झरना थापाले नै गर्नेछिन् । मेरो फिल्मसँग कुरा गर्दै झरनाले भनिन्–‘हो, हामीले फिल्मको तयारी सुरु गरेका छौँ । अहिले फिल्मको कथा र गीतसङ्गीतमा काम भइरहेको छ । आउँदो बर्षको भदौबाट छायांकन सुरु गर्ने तयारी छ ।’

फिल्म ‘ए मेरो हजुर ५’मा कलाकारको कोही पनि तय भएका छैनन् । तर, नायिका सुहाना थापाले काम गर्ने कुरा पक्का जस्तै छ । अब, यसपटक नायकको रुपमा झरना र सुनीलले कसलाई अनुबन्धित गर्छन्, त्यसका लागि केही समय पर्खनुपर्ने हुन्छ । 

झरनाका अनुसार, फिल्मलाई वि.सं २०८१ को अन्तिम साता रिलिज गर्ने तयारी गरिएको छ । झरनाले ‘ए मेरो हजुर’को सिरिज नयाँ वर्षलाई लक्षित गरेरै रिलिज गर्दै आएकी छिन् । 

‘ए मेरो हजुर २ देखि ४’सम्मको निर्देशन झरनाले नै गर्दै आएकी छिन् । यसको सबै सिरिजले बक्स अफिसमा राम्रो व्यापार गरेका छन् । यसैले, हिट फिल्मको सिरिजलाई नै अगाडि बढाउने सोचमा सुनील र झरना पुगेका हुन् । फिल्म ‘ए मेरो हजुर ५’लाई पनि लभ स्टोरी कथामा नै निर्माण गर्ने तयारी सुहाना इन्टरटेन्मेन्टको छ ।