‘महाजात्रा’को फस्टलुकमा हरिवंश, विपिन र रविन्द्र

चैत्रको ९ गतेबाट रिलिजमा आउन लागेको फिल्म ‘महाजात्रा’को फस्टलुक आज रिलिज गरिएको छ । फिल्म रिलिजको मिति नजिकिएपछि यसको निर्माणपक्षले प्रचार पनि सुरु गरेको हो । 

प्रदीप भट्टराईको लेखन तथा निर्देशनमा तयार भएको यो फिल्मको फस्टलुकमा मुख्य कलाकारहरू हरिवंश आचार्य, विपिन कार्की, रवीन्द्र सिंह बानियाँ र रवीन्द्र झालाई देखाइएको छ । 

हरिवंशलाई फस्टलुकमा ह्वीलचियरमा बसेको देख्न सकिन्छ । चार पात्रको अगाडि पैसा नै पैसा उडाइएको छ । जसलेगर्दा, यसपटक पनि फिल्मले पैसाको खेलालाई नै प्रस्तुत गर्ने पक्का छ । 

म्याक्स दीपेश खत्री र यज्ञश्वर पौडेलको लगानीमा तयार भएको फिल्मका कार्यकारी निर्माता रवीन्द्र सिंह बानियाँ हुन् । षट्कोण फिल्मसको ब्यानरमा निर्माण भएको यो फिल्ममा वर्षा राउत, दिव्य देव लगायतका कलाकारको पनि अभिनय छ । 

यो फिल्मको छायांकन केही दिन अगाडि मात्र सकिएको थियो । यसपटक हरिवंशको इन्ट्रीले फिल्मलाई अझ विशेष बनाएको छ । 

यो फिल्मले बक्स अफिसमा बम्पर व्यापार गर्ने अपेक्षा गरिएको छ । फिल्मले कैयौं रेकर्डहरु तोड्ने आँकलन भइरहेको छ । फिल्ममा पुरुषोत्तम प्रधानको छायांकन छ ।