नयाँ बर्षमा सौगात र विपिनको ‘द रेड सुटकेस’ रिलिज हुने

फिल्म ‘द रेड सुटकेस’को प्रदर्शन मिति तय गरिएको छ । यो फिल्म अब नयाँ बर्षको अवसर पारेर चैत्र ३० गतेबाट नेपालभर रिलिज हुने भएको छ । विश्वका प्रतिष्ठित फिल्म फेस्टिभलमा यो फिल्म प्रदर्शन भइसकेको छ ।

मिथक, नेपालको आप्रवासी परम्परा र नियतिलाई पृष्ठभूमिमा राखेर कथा वाचन गरिएको फिल्मलाई फिडेल देवकोटाले निर्देशन गरेका हुन् ।

सेप्टेम्बर महिनामा भेनिसमा वर्ल्ड प्रिमियर भएको फिल्मले सोही फेस्टिभलमा महत्वपूर्ण दुई अवार्ड जितेको थियो । त्यसयता यो फिल्म संसारकै पुरानो मध्ये एक मानिने जर्मनीको म्यानहाइम हाइडेलवर्ग इन्टरनेसनल फिल्म फेस्टिभल, स्विजरल्यान्डको जुरिच फिल्म फेस्टिभल, भारतको मुम्बई फिल्म फेस्टिभल आदि ठाउँमा छनौट भएको थियो ।

निर्माता रामकृष्ण पोखरेलले विदेशी दर्शकबाट फिल्मले प्रशस्त स्नेह पाएको र घरेलु दर्शकबाट सोही स्तरको स्नेहको अपेक्षा गर्दै प्रदर्शन गर्ने निर्णयमा पुगेको बताएका छन् ।

फिडेलकै लेखन रहेको यो फिल्ममा सौगात मल्ल, विपिन कार्की, प्रविन खतिवडा, सृष्टि श्रेष्ठ आदि कलाकारको अभिनय छ । सुशन प्रजापतिको छायांकन रहेको फिल्मलाई समन अलभितिगाले सम्पादन गरेका हुन् ।

श्रीलंकामा प्राविधिक काम गरिएको फिल्ममा शोभा थापा निर्माता र श्रीलंकाकै विमुक्ति जयसुन्दरा सह–निर्माताको रुपमा रहेका छन् ।