अनमोलको लाइनअपः भदौमा जेरी, ‘बलिदान’को स्क्रिप्ट कुर्दै

नायक अनमोल केसीले अफर आएका सबै फिल्म साइन गर्ने हो भने, उनको हातमा दर्जन बढी फिल्म हुन्थे होला । तर, अनमोल अफर आएका मध्ये निकै कम मात्र फिल्म साइन गर्छन् ।

हरेक दिनजसो उनी कुनै न कुनै मेकरसँग नयाँ फिल्मका लागि मिटिङ बसिरहेका हुन्छन् । अनमोललाई फिल्मको अफर बग्रेल्ती रुपमा आइरहेका छन् । 

तर, अनमोल केसीको लाइनअपमा भने साइन गरेका २ फिल्म मात्र छ । जेठको ११ गतेबाट रिलिजमा आउने पक्का भएको फिल्म ‘फर्की फर्की’को पहिलो सेड्यूलको छायांकन उनले पोखरामा सकाएका छन् । अब, दोस्रो सेड्यूलको छायांकन एक सातापछि काठमाडौंमा सुरु हुनेछ । 

यो फिल्मको छायांकन सकाएपछि अनमोलले ७ महिना ग्याप लिनुपर्ने अवस्था आउँछ । किनभने, उनले काम गर्ने भनेको अर्को फिल्म ‘जेरी अन टप’को छायांकन भदौमा मात्र सुरु हुँदैछ । यसैले, यो बीचको ७ महिनामा अर्को फिल्ममा काम गर्ने वा ‘जेरी अन टप’लाई नै पर्खने भन्ने निर्णय उनले लिएका छैनन् । 

तर, उनलाई निर्माता तथा निर्देशक सन्तोष सेनले ‘बलिदान’ फिल्मको लिड रोलमा अफर गरेका छन् । यो फिल्मको कथा पूर्ण भइसकेको छैन । यसैले, स्क्रिप्ट पूर्ण भइसकेपछि पढेर निर्णय दिने अनमोलको सोच छ । 

अनमोल राम्रो कथामा अफर आएको खण्डमा गर्ने तर धमाधम फिल्म साइन गरिहाल्नुपर्छ भन्नेमा सोचमा छैनन् । यसैले, उनको फिल्म रिलिज हुनका लागि नै लामो समय लाग्ने गरेको छ ।