‘पर्खि बसें तिमीलाई’को प्रचारमा हर्क साम्पाङ

धरानका मेयर हर्क साम्पाङ नेपाली फिल्मप्रति पनि राम्रै मोह राख्छन् । धरानमा आयोजना हुने फिल्म सम्बन्धी विभिन्न गतिविधिमा उनी सहभागी हुने गरेका छन् । 

यसैबिच, मेयर साम्पाङले फिल्म ‘पर्खि बसें तिमीलाई’का निर्देशक दीपक श्रेष्ठलाई भेट गर्दै फिल्मको सफलताको शुभकामना दिएका छन् । 

यो फिल्म पौषको २७ गतेबाट रिलिज हुँदैछ । यो फिल्मको एक शोबाट उठेको रकम धरानमा सुन्मिमा पारुहाङ निर्माणमा सहयोग गर्ने घोषणा निर्माणपक्षले गरेको छ । 

मेयर साम्पाङले फिल्मको टिमलाई बधाई दिँदै सबैले नेपाली फिल्म हेरेर नेपाली उत्पादनलाई बढावा दिन पनि आग्रह गरेका छन् । फिल्मको पोस्टर बोकेर तस्विर खिचाउँदै मेयर साम्पाङले फिल्मको टिमले एक शो बराबरको रकम सहयोग गर्न लागेकोमा खुशी व्यक्त गरे । 

यो फिल्ममा शिव श्रेष्ठको साथमा नव–कलाकारहरु किरण श्रेष्ठ र रक्षा बुढाथोकी मुख्य भूमिकामा छन् । लभ स्टोरी कथामा निर्माण भएको यो फिल्मको ट्रेलरलाई दर्शकले रुचाएका छन् । यसैले, फिल्मले व्यापारिक रुपमा राम्रो कारोबार गर्ने अपेक्षा गरिएको छ ।