‘डिग्री माइला’मा यस्तो छ दयाहाङको गेटअप

नयाँ वर्षलाई लक्षित गरी रिलिज हुन लागेको फिल्म ‘डिग्री माइला’को केन्द्रीय भूमिकामा नायक दयाहाङ राई छन् । बाँसुरी फिल्मस् र कबड्डी फिल्मस्ले सुष्मा प्रोडक्शनसँग सहकार्य गर्दै निर्माण गरेको यो फिल्मको क्यारेक्टर पोस्टर सार्वजनिक गरिएको छ ।

नायक दयाहाङ राईलाई मात्र राखेर फिल्मको पहिलो लुक्स रिलिज गरिएको हो । जहाँ, दयाहाङ गम्भीर रुपमा केही सोचिरहेको देख्न सकिन्छ । 

यो फिल्मलाई रामबाबु गुरुङले निर्देशन गरेका हुन् । फिल्ममा दयाहाङ बाहेक आँचल शर्मा, विजय बराल, बुद्धि तामाङ लगायतका कलाकारको पनि अभिनय छ । 

फिल्म ‘डिग्री माइला’को केही दृश्यको छायांकन हुन अझै बाँकी नै छ । तर, फिल्म रिलिजका लागि साढे ३ महिना बाँकी रहँदा निर्माणपक्षले भने प्रचार आरम्भ गरेको छनक दिएको छ । 

आउँदो बर्षको सुरुवातमै बक्स अफिसमा धमाका गर्ने अपेक्षा गरिएको यो फिल्म निर्देशक रामबाबुका लागि पनि चुनौतीपूर्ण छ । किनकी, ‘कबड्डी’ सिरिजबाहेक अन्य फिल्ममा सफल हुन नसकेका रामबाबुलाई यो फिल्म सफल बनाउनुपर्ने चुनौती छ ।