पोखरा स्ट्रिट फेस्टिवलमा हजारको टिकटमा ८ सय ५० को फुड भौचर

नयाँ वर्षको अवसरमा पोखरा हुने २५ औं पोखरा सडक महोत्सव नजिकिदैं गर्दा आयोजकहरूले प्रवेश टिकटमा आकर्षक अफरहरू ल्याएका छन्। 

खल्ती एपबाट पाँचै दिनको टिकट एकसाथ काटेमा झण्डै ८५० रूपैयाँ बराबरको फुड भौचर प्राप्त हुनेछ। पाँचै दिनको टिकट मात्र हजार रूपैयाँमा खल्ती एपबाट काट्न सकिनेछ।

महोत्सवमा प्रत्येक दिनको छुट्टाछुट्टै टिकट काट्दा २६ सय ५० रुपैयाँ पर्ने भएपनि खल्ती एपबाट हजार रूपैयाँमा पाँचै दिनको एकसाथ टिकट काट्दा १६ सय ५० रुपैयाँ बराबरको नगद छुट हुनुका साथै  ८ सय ५० रुपैयाँको गोल्डेन टिकट अफरको फाइदा महोत्सवको टिकट काट्नेले पाउनेछन्।

यो योजना पर्सी बिहीबार १२ बजेसम्म टिकट काट्दा लागु हुने जानकारी आयोजकले दिएको छ । यो योजना कार्यक्रम प्रवेश स्थलको भीड कम गर्नकालागि आयोजकले व्यवस्था गरेको हो। यो अफर अनलाइन टिकट काट्नेहरूको हकमा मात्र लागु हुनेछ।

पोखरा महोत्सव २८ डिसेम्बरदेखि जनवरी १ सम्म चल्नेछ। 

यसैगरी न्यू इयर इभमा रात्रिकालिन सांगीतिक कार्यक्रममा सहभागीले ७ सयको प्रवेश शुल्कमा ५ सय बराबरको फुड भौचर पाउनेछन् भने डिसेम्बर २९ र ३० मा टिकटमा ३ सय ५० रुपैयाँ बराबरको फुड भौचर प्राप्त गर्नेछन् । यो दिनमा दिउँसोको कार्यक्रमका लागि ३ सय र रात्रिकालिन कार्यक्रमका लागि ४ सय रूपैयाँ प्रवेश शुल्क तोकिएको छ । 

महोत्सवलाई रेस्टुरेन्ट एण्ड बार एसोसिएसन नेपाल (रेबान)ले विगत २५ वर्षदेखि  निरन्तर आयोजना गर्दै आइरहेको छ। यो महोत्सव नेपालकै सबैभन्दा ठूलो सडक महोत्सव हो  रेवानले यो महोत्सवमा एड साथी तथा स्वर्णिम इन्टरटेन्मेन्टसँग व्यवस्थापकिय सहकार्य र 'नोस्टाल्जिक-थ्री'सँग  फूड कोर्ट पार्टनरका रुपमा सहकार्य गरिरहेको छ।