‘पर्खी बसे तिमीलाई’को ट्रेलरमा किरण र रक्षाको प्रेम–विछोडको कथा

दीपक श्रेष्ठको निर्देशनमा तयार भएको फिल्म ‘पर्खी बसे तिमीलाई’को ट्रेलर आज युट्युबमा सार्वजनिक गरिएको छ । राजाराम बुढाथोकी निर्माता रहेको यो फिल्मलाई दीपकले लभ स्टोरी कथामा तयार पारेका छन् । 

धनाढ्य परिवारकी छोरी र पठाओ चलाएर जीवन चलाउँदै आएको एक युवाको प्रेम कथामा यो फिल्म निर्माण भएको छ । फिल्ममा नयाँ कलाकारहरू किरण श्रेष्ठ, रक्षा बुढाथोकी र अनिसा रसाइलीले मुख्य भूमिकामा काम गरेका छन् । उनीहरूको साथमा शिव श्रेष्ठ, सुनिता श्रेष्ठ, विल्सन विक्रम राई र मनिष श्रेष्ठ फिल्ममा मुख्य भूमिकामा छन् । 

फिल्मको ट्रेलर हेर्दा लभ स्टोरी कथामा दीपकले यसपटक पनि दर्शकको मन छुने फिल्म बनाएको अनुमान लगाउन सकिन्छ । दीपकले नै निर्देशन गरेको फिल्म ‘पर्खी बसे’ले बक्स अफिसमा सुपरहिटको व्यापार गरेको थियो । फिल्मको ट्रेलर हेर्दा नयाँ कलाकारद्वय किरण र रक्षाको कामबाट सन्तुष्ट हुने ठाउँ प्रशस्त भेटिन्छ । 

शम्भुजित बास्कोटा, महेश खड्का, दीपक शर्मा र बाबुल गिरीको संगीत रहेको यो फिल्ममा रामजी लामिछानेको कोरियोग्राफी, संकल भुजेलको डीओपी, परिच्छेद सेन र पुरुषोत्तम ढुङ्गेलको कथा, पटकथा तथा संवाद, भूपेन्द्र अधिकारीको सम्पादन छ ।

पौषको २७ गतेबाट रिलिज हुने यो फिल्मले व्यापारिक रुपमा सफलता कायम गरेको खण्डमा सुस्ताएको लभ स्टोरी फिल्मको बजार फेरि उठ्नेछ ।