‘पर्खी बसेँ तिमीलाई’को फस्टलुकमा शिवदेखि किरण र रक्षासम्म

निर्देशक दीपक श्रेष्ठको निर्देशनमा तयार भएको नयाँ फिल्म ‘पर्खी बसेँ तिमीलाई’को दुई नयाँ पोस्टर सार्वजनिक गरिएको छ । सार्वजनिक भएका दुई पोष्टरमा मुख्य कलाकारहरूको रोमान्टिक भावदेखि प्रेमले निम्त्याएको वेदना समेत प्रस्तुत गरिएको छ ।

निर्देशक श्रेष्ठको २७ औं फिल्ममा मुख्य कलाकारको रुपमा किरण श्रेष्ठ र रक्षा बुढाथोकीले डेब्यू गर्दैछन् । विशुद्ध प्रेमकथामा निर्माण भएको यो फिल्मबाट डेब्यू गर्न लागेका दुई कलाकारलाई फिल्म क्षेत्रले बलियो स्वागत गर्ने विश्वास निर्देशक श्रेष्ठको छ । फिल्मकी मुख्य नायिका रक्षा बुढाथोकीले आफूहरू नयाँ कलाकार भएपनि टिमले नै राम्रो काम गरेकाले फिल्म उत्कृष्ट बनेको बताइन् ।

यस्तै, नव–नायक किरण श्रेष्ठले पनि दीपक श्रेष्ठ जस्ता ब्रान्ड निर्देशकसँग काम गर्न पाउँदा खुशी लागेको सुनाए । यो फिल्मलाई राजाराम बुढाथोकीले निर्माण गरेका हुन् । उनले, फिल्म निर्माणमा कुनै पनि संझौता नगरिएको सुनाए । 


रोमान फिल्म र तपश्री फिल्म्स (सिक्किम) को सङ्युक्त ब्यानरमा निर्माण गरिएको फिल्ममा अनिशा रसाइली, शिव श्रेष्ठ, विल्सन विक्रम राई, सुनिता श्रेष्ठ लगायतका कलाकारले अभिनय गरेका छन् । 

यसमा राजाराम बुढाथोकीको निर्माण, कोमल गुरुङको सह–निर्माण, परिच्छेद सेन, मौनता श्रेष्ठ र पुरुषोत्तम ढुङ्गेलको लेखन, संकल्प भुजेलको छायाङ्कन, शम्भुजित बास्कोटा, दीपक शर्मा, महेश खड्का र बाबुल गिरीको सङ्गीत, भूपेन्द्र अधिकारीको सम्पादन, मनोरञ्जन श्रेष्ठको कलर करेक्सन, रामजी लामिछाने र निशा रसाइलीको नृत्य निर्देशन रहेको छ । 

यसको छायाङ्कन नेपालसँगै सिक्किमको रमणीय स्थानमा गरिएको छ ।