माघदेखि जेठसम्म दयाका ६ फिल्म

नायक दयाहाङ राईको फिल्म रिलिजमा बाढी नै लागेको छ । एक वर्षमा दयाले डेढ दर्जन फिल्ममा काम गर्दैछन् । तर, उनको फिल्म रिलिजको संख्या पनि उस्तै छ । जसले हेर्दा, दर्शकले दयाका हरेक महिना रिलिज हुन लागेका फिल्मलाई कस्तो प्रकारको प्रतिक्रिया दिने हुन् भन्ने चासो आम मानिसहरूमा छ । 

मङसिर र पुष महिनामा दयाका कुनै पनि फिल्म रिलिज नहुने पक्का छ । तर, माघ महिनादेखि उनको फिल्मको रिलिजको चाप छ । माघको २६ गते दयाका ‘दयारानी र हात्तीछाप’ रिलिज हुँदैछन् । एकैदिन, दुई फिल्म रिलिज हुँदा प्रचारमा दयालाई समस्या पर्ने निश्चित छ । 

फागुनमा दयाको ‘रंगेली’ रिलिज हुँदैछ । फागुनको २५ गतेबाट यो फिल्म रिलिज हुँदैछ । चैत्रमा पनि उनको ‘डिग्री माइला’ रिलिज हुँदैछ । चैत्रको अन्तिम साता यो फिल्मको प्रदर्शन मिति तय गरिएको छ । 

वैशाखको २१ गते दयाले अभिनय गरेको फिल्म ‘मनसरा’ रिलिज हुँदैछ । यो फिल्ममा उनको जोडीको रुपमा नायिका मिरुना मगरले काम गरेकी छिन् । जेठको १८ गते नबिन सुब्बाको निर्देशनमा तयार भएको फिल्म ‘गाउँ आएको बाटो’ रिलिज हुँदैछ । यसमा दया मुख्य भूमिकामा छन् । 

माघ महिनादेखि जेठसम्म दयाका आधा दर्जन फिल्म रिलिज हुँदै गर्दा त्यसपछिका महिनामा पनि उनको फिल्म रिलिजको लाइन लाग्ने पक्का देखिन्छ । किनकी, उनले अर्को वर्षका लागि मात्र एक दर्जन बढी फिल्ममा काम गर्दैछन् ।

यसैले, आउँदो वर्षमा हरेक महिना दयाका एक वा दुई फिल्म दर्शक माझ आउनेछन् । यसरी फिल्म रिलिज हुँदा दर्शकलाई दयाका फिल्मसँग मोह भंग भयो भने धेरै निर्माता चिप्लिने निश्चित छ ।