माघ २६ः चार फिल्म रिलिज हुने चर्चा, अन्तिममा दया भर्सेस दया मात्र

नेपाली फिल्मका निर्माताले कुनै मिति बुक गर्नु र बुक गरेकै मितिमा फिल्म रिलिज गर्नु फरक कुरा हो । हतारमा कुनै मिति बुक गर्ने र अन्तिममा पछि सर्ने नियति लामो समयदेखि देखिँदै आएको हो । 

माघ २६ मा सुरुवातमा चार वटा फिल्म रिलिज हुने पक्का गरियो । यो मितिमा किरण नेपालीको निर्माणमा सिमोस सुनुवारले निर्देशन गरेको फिल्म ‘हात्तीछाप’ प्रदर्शन हुने पक्का भएको थियो ।

तर, यही मितिमा ज्ञानेन्द्र देउजाले निर्देशन गरेको फिल्म ‘उपहार’, दिवाकर भट्टराईले निर्देशन गरेको फिल्म ‘हनी बनी’ र माओत्से गुरुङको निर्देशनमा तयार भएको फिल्म ‘दयारानी’ रिलिज हुने पक्का गरियो । 

तर, रिलिजको मिति नजिकिदै जाँदा फिल्म ‘उपहार’ पछि सरिसकेको छ । यो फिल्म फागुनको २५ गतेबाट रिलिज हुँदैछ । यस्तै, यही मितिमा आउने भनेर पोस्टर समेत सार्वजनिक गरिएको फिल्म ‘हनी बनी’ अब रिलिज नहुने भएको छ । यो फिल्ममा जसिता गुरुङ मुख्य भूमिकामा छिन् । 

अन्तिममा, माघ २६ को मितिमा नायक दयाहाङ राईका दुई फिल्म मात्र रिलिज हुने भएका छन् । ‘हात्तीछाप’मा दयाहाङ राई, सौगात मल्ल, उपासना सिंह ठकुरी, बुद्धि तामाङ, विजय बराल, विल्सन विक्रम राई लगायतका कलाकारको अभिनय छ । यसको टिजर पनि सार्वजनिक भइसकेको छ । दर्शकले फिल्मको टिजरलाई मन पराएका छन् । यस्तै, यही मितिमा रिलिज हुन लागेको फिल्म ‘दयारानी’मा दयाहाङ राई र दिया पुनको मुख्य भूमिका छ । 

योसँग माघ महिनामा तीन वटा मात्र फिल्म रिलिज हुने भएका छन् । माघ महिनामा फिल्म ‘नम्बरी सुन’ पनि रिलिज हुँदैछ ।