के सन्तोष सेनको क्याम्पमा अनमोल केसीको प्रवेश होला ?

नायक अनमोल केसी र निर्माता सन्तोष सेनले एकैसाथ फिल्ममा काम गर्ने भन्दै भेटघाट गरेको धेरै भइसकेको छ । फिल्म ‘प्रेमगीत’का लागि पनि अनमोल केसी नै पहिलो रोजाइमा थिए । तर, सन्तोष र अनमोलको सहकार्य हुन सकेन । 

यसपछि, पनि उनीहरुबीचमा विभिन्न प्रोजेक्टलाई लिएर कुराकानी नभएको होइन । तर, पनि दुईको सहकार्य हुन सकिरहेको छैन । 

यसैबिच, निर्माता सन्तोष सेनले नायक अनमोल केसीलाई नयाँ फिल्म ‘बलिदान’का लागि अफर गरेका छन् । तर, फिल्म ‘फर्की फर्की’को छायांकनमा व्यस्त भएकाले अनमोल केसीले ‘बलिदान’को स्क्रिप्ट भने पढ्न पाएका छैनन् । 

यो फिल्मसँगै सन्तोष सेनले बनाउने अन्य फिल्ममा पनि सहकार्य गर्ने विषयमा अनमोलसँग कुराकानी भइरहेको छ । 

यसैले, अनमोल केसी र सन्तोष सेनबीच टिमअप हुने संभावना बलियो छ । पुष महिनाबाट छायांकन सुरु हुने फिल्म ‘बलिदान’मा नायक सौगात मल्ल फाइनल भइसकेका छन् ।