जुरमुराए चकलेटी हिरोहरु

नेपाली फिल्म क्षेत्रमा दयाहाङ राइको एकलौटी राज छ । उनको हातमा फिल्मको अभाव छैन । दयाहाङ राई, सौगात मल्ल, विपिन कार्कीको हातमा फिल्म धेरै हुँदा चकलेटी हिरोहरु हराएको चर्चा भइरहेको थियो । अनमोल केसी, प्रदीप खड्का लगायतका नायकहरू कता हराए भन्ने खालका प्रश्न उठिरहेको थियो । 

तर, अब चकलेटी नायकहरू जुरमुराउन थालेका छन् । एकपछि अर्को फिल्मको घोषणाले फेरि पनि बजारमा चकलेटी नायकहरूको उपस्थितिलाई बलियो बनाएको छ । 

नायक अनमोल केसी फिल्म ‘फर्की फर्की’मा काम गरिरहेका छन् । फिल्मको घोषणादेखि नै यसको हाइप उच्च छ । रोहित अधिकारीको निर्माणमा सुयोग गुरुङको निर्देशनमा बनिरहेको यो फिल्म आउँदो बर्षको जेठ ११ गतेबाट रिलिज हुँदैछ । आउँदो बर्षको दोस्रो महिनामा यो फिल्मले बक्स अफिसमा राम्रो व्यापार गरेको खण्डमा चकलेटी नायकहरूको चर्चा नयाँ तरिकाले अगाडि बढ्नेछ । 

नायक प्रदीप खड्का एक बर्ष हराए । तर, उनी अहिले धमाधम फिल्मको घोषणा गरिरहेका छन् । प्रदीपको यो सक्रियताले फेरि फिल्म बजारमा नयाँ सन्देश दिएको छ । उनको हातमा ‘पुजार सार्की, ऐरी र एक्टर’ नामक फिल्म छ । प्रदीपलाई फिल्मको अफर नै अफर छ । उनले, सोचेर मात्र काम गरिरहेका छन् । 

अनमोल र प्रदीप जुरमुराउँदा नायक धिरज मगर फिल्म ‘पञ्चामृत’को प्रतीक्षा गरिरहेका छन् । यो फिल्मको छायांकन सुरु भएको खण्डमा धिरजलाई पनि राहत हुनेछ । 

नायक आर्यन सिग्देल पनि फिल्ममा काम गर्न सक्रिय रुपमा लागिरहेका छन् । उनले फिल्म साइन त धमाधम गरिरहेका छन् । तर, फिल्मको छायांकन सुरु नहुँदा आर्यनलाई समस्या भएको छ । आर्यनले अब फिल्म ‘पुजार सार्की’मा काम गर्दैछन् । उनको हातमा अन्य केही फिल्म पनि छन् । 

चकलेटी नायकहरूको सक्रियताले अर्को बर्ष रिलिज हुने फिल्मको बक्स अफिसको आकलन अहिलेबाट नै सुरु भएको छ । केही ब्यानरमा मात्र सीमित भएको फिल्म क्षेत्रले फराकिलो बाटो कोर्न आवश्यक छ । यस्तो अवस्थामा, चकलेटी हिरोहरु पनि सक्रिय हुन जरुरी छ ।