मलिका महतः सौगातको भर पर्लिन् कि आफै चल्लिन् ?

नायिका मलिका महतलाई दर्शकले अझै पनि म्युजिक भिडियोको मोडलको रुपमा चिन्छन् । फिल्म ‘यात्रा र पानी फोटो’मा काम गरेपनि उनले आफूलाई नायिकाको रुपमा स्थापित गर्न सकेकी छैनन् । यसैले, त मलिका महतका लागि फिल्म क्षेत्रका ढोका बलियो हुन अझै समय लाग्नेछ । 

करिअरमा मलिकाले अहिलेसम्म ४ वटा मात्र फिल्ममा काम गरिन् । जसमा २ वटा रिलिज भएका छन् भने २ वटा रिलिजको क्रममा छन् । 

मलिका महतले करिअरको तेश्रो फिल्ममा नै आफ्नो काँध बलियो बनाउनु पर्ने जिम्मेवारी पाएकी छिन् । लक्ष्मण सुवेदी निर्देशित फिल्म ‘सतीदेवी’ले उनको काँधमा गरुङ्गो भारी बोकाइदिएको छ । किनकी, यो फिल्मको हिरो नै उनी हुन् । 

फिल्मको फस्टलुकले दर्शक र फिल्मीकर्मीको निकै साथ पायो । मलिका महतको गेटअपले तारिफ बटुलिरहँदा निर्देशक सुवेदी दंग छन्  । फिल्मको फस्टलुक यस्तो शैलीको आउला भनेर मलिकाले पनि सोचेकी थिइनन् । 

एकातिर, उनको काँधमा सिंगै फिल्म बोक्नुपर्ने जिम्मेवारी छ भने फागुणको २५ गतेबाट रिलिज हुन लागेको फिल्म ‘अगस्त्य’मा भने उनले स्टार नायक सौगात मल्लको साथ पाएकी छिन् ।

सौरभ चौधरीको निर्देशनमा तयार भएको यो फिल्ममा सौगात मल्ल र नाजिर हुसेन जस्ता नायक छन्, जसको चर्चाले मलिका महतलाई केही हदसम्म ओझेलमा पारिदिन सक्छ । 

तर, अर्कोतिर मलिकालाई आफै चलेर फिल्म क्षेत्रका स्थापित हुने अवसर पनि छ । मलिका आफै चल्लिन् या सौगातको भर पर्लिन् त्यो समयले बताउनेछ । तर, नेपालमा महिला केन्द्रित फिल्म खासै नबनिरहेको समयमा ‘सतीदेवी’ चल्यो भने, मलिका महतलाई मात्र होइन अन्य नायिकाहरुलाई पनि बलियो साथ मिल्नेछ ।