‘सतीदेवी’को फस्टलुकमा मलिका महत्तको भिन्न गेटअप

दिलासा र साराको प्रस्तुतिमा तयार भएको फिल्म ‘सतीदेवी’को फस्ट लुक सार्वजनिक भएको छ । सार्वजनिक भएको फस्ट लुक हेर्दा फिल्म फरक र विशेष रहेको बुझ्न सकिन्छ । 

यो फिल्मको निर्देशन लक्ष्मण सुवेदीले गरेका हुन् । फिल्मको नाम सुन्दा सुरुवातमा कुनै धार्मिक कथामा फिल्म बनेको हो कि भन्ने अनुमान आम मानिसहरूले लगाएका थिए । तर, फस्टलुकले फिल्मको बारेमा भिन्न अनुमान गर्न वाध्य बनाइदिएको छ । 

फिल्मको फस्टलुकमा मुख्य भूमिकामा रहेकी नायिका मलिका महतलाई देखाइएको छ । तर, घाटीमा जुत्ताको माला र अनुहारमा कालो मोसो दलेर मलिकालाई गाउँलेहरूले लखेट्दै गरेको तस्विर फस्टलुकमा समावेश छ । यसले, फिल्मप्रति आम मानिसहरूको चासो अझै बढाएको छ । 

यो फिल्ममा मलिका महत्तसँगै हर्षिका वली, मञ्जिला बानियाँ(बाल कलाकार), सन्दीप बाबु लोहनी, रमेश बुढाथोकी, कुलदीप अधिकारी, भोला सापकोटा, सृजना अधिकारी, सुजिता सिवाकोटी, सन्देश लिम्बु, मनिषा  सापकोटा, जयन्त रेग्मी, बिमल श्रेष्ठ, देव महर्जन, तुलसी श्रेष्ठ, इभेन जोशी, इश्वरी सिंह, पवन केसी र जगदिश अधिकारीको अभिनय छ । 


बाबु श्रेष्ठको छायांकन रहेको फिल्ममा तारा थापाको सम्पादन, दीपक शर्मा र सुवास थापाको संगीत, रामजी लामिछानेको कोरियोग्राफी, देव महर्जनको एक्सन छ । दिलासा, सारा र श्रीदेवी सुवेदीको लगानीमा बनेको फिल्ममा लेखन पनि निर्देशक सुवेदीको नै छ ।

फिल्मको प्रदर्शन मिति तय गरिएको छैन । तर, नारी प्रधान यो फिल्ममा निर्देशक सुवेदीले सामाजिक कथालाई सूक्ष्म रुपमा देखाउन खोजेको फस्टलुकबाट आकलन गर्न सकिन्छ । यो फिल्म नायिका महतका लागि पनि विशेष छ । फस्टलुकले फिल्मप्रति चासो झन् बढाइदिएको छ ।