फिल्म रिलिजको सेड्यूलः हरेक महिना २–३ वटा मात्र फिल्म

भदौ महिनामा निकै चाप देखिएको नेपाली फिल्मको सेड्यूल असोज लागेपछि भने  कम बन्यो । असोजमा ‘वानर सेना र परदेशी २’ मात्र रिलिजमा आएका थिए । 

कार्तिकमा दशैं र तिहार जस्ता ठूला पर्व भएपनि फिल्म रिलिजको संख्या भने जम्मा २ वटा देखियो । कार्तिक महिनामा ‘पशुपति प्रसाद २ र दिमाग खराब’ मात्र रिलिजमा आएका थिए । 

मंसिर महिनामा फिल्म रिलिजको सेड्यूल झनै कमजोर छ । यो महिना २९ गते फिल्म ‘दुई कदम’ रिलिज हुँदैछ । यसअघि ३ साता कुनै फिल्म रिलिजको सेड्यूल छैन । यसले, कतै यो बर्ष नेपाली फिल्म नै कम बनेका हुन् कि भन्ने देखाएको छ ।

पौष महिनामा पनि फिल्म रिलिजको बलियो सेड्यूल छैन । पौषको २७ गतेबाट ‘चित्रा, देववाणी, पर्खि बसेँ तिमीलाई’ गरी ३ फिल्म मात्र रिलिज छन् । यसअघि पौष महिनाका ३ साता ठूला हिन्दी फिल्म आउने भएपछि निर्माता तर्सिएका छन् । उसो त, पौष महिनाको जाडोका कारण पनि फिल्म रिलिज गर्न निर्माताहरु खासै अगाडि सर्दैनन् । 

माघमा भने ४ वटा फिल्म रिलिज हुने देखिएको छ । माघको १९ गते ‘नम्बरी सुन’ रिलिज हुनेछ । माघको २६ गते भने ‘हात्तीछाप, दयारानी र हनी बनी’ रिलिजको तयारीमा निर्माताहरु छन् । कुनै मितिमा फिल्म नै नहुने तर कुनै मितिमा ३ वटासम्म फिल्म जुध्ने परम्परा नेपाली फिल्मका लागि नयाँ होइन । 

फागुण महिनामा पनि अहिलेसम्म ३ वटा फिल्म रिलिज हुने देखिएको छ । फागुणको २५ गते ‘उपहार, रंगेली र काँडेतार, अगस्त्य’को रिलिजमा निर्माताहरु लागेका छन् । यो महिनाको पनि ३ सातामा कुनै फिल्म रिलिजको सेड्यूल छैन । तर, एउटै मितिमा भने निर्माताहरु हानथाप गरिरहेका छन् । 

चैत्र महिनामा अहिलेसम्म ‘महाजात्रा’ रिलिजको मिति तोकिएको छ । यो फिल्म चैत्रको ९ गतेबाट रिलिज हुनेछ । यसपछि, नयाँ बर्षलाई लक्षित गरेर फिल्म ‘डिग्री माइला’ रिलिज हुने सेड्यूल छ ।

यसरीहेर्दा, अहिलेसम्मको प्रदर्शनको सेड्यूल अनुसार अबको ५ महिनामा १४ वटा फिल्मको प्रदर्शन मिति तय गरिएको छ । यो बर्ष नेपाली फिल्म रिलिजको संख्या घट्ने पक्का देखिएको छ । गतबर्ष करिब ५० वटा फिल्म रिलिज भएकोमा यो बर्ष त्यो संख्या पनि केही घट्ने पक्का जस्तै छ ।